[للمبتدئين] كل ما يخص أجهزة سامسونج من [روت | ريكفري | رومات]

إزيكوا يا ولاد 😀 - معاكم أبو معز فخر اجهزة Galaxy Note 3 في الوطن العربي ، ومش هبطل غير اما سامسونج تيجي تبوس كتفي الأول وتجيبلي Samsung Galaxy S8 ومعاه Samsung Galaxy Note 7 FE الجديد هدية 😀 ..

من فترة كدة كنت عملت بوست أسأل فيه على المبتدأين اللي ماعندهومش فكرة عن الرومات والروت أو التعديلات بشكل عام ، كنت عايز اشوف موجود معانا مبتدأين أد ايه تقريباً ، واستغربت جداً إنهم طلعوا كتير ، وساعتها وعدت إني هعمل بوست تفصيلي للموضوع ده موجه للمبتدئين منكوا وحتى المحترفين كمان ، لأنها هتكون تعليمات أكتر منها خطوات ثابتة وتقدر ترجعلها اما يحصل أي مشكلة في تليفونك بعد كده في حالة لو كنت بتجرب حاجة جديدة مثلاً او جيت تفلش ملف غلط او تعمل تعديل معين بوظلك الدنيا .

عشان تعرف إيه هو الروت اقرا البوست ده : ما هو الروت ؟!


إقرأ أيضاً :


طبعاً كلامي بالتفصيل هيكون على أجهزة Galaxy Note 3 لأن ده اللي احنا متعودين عليه عموماً وفي ناس كتير معانا برضه معاها نفس الجهاز ده - بس ماتقلقش الخطوات اللي هتقراها دلوقتي مناسبة جداً لمعظم أجهزة سامسونج طبعاً مع اختلاف بعض التفاصيل البسيطة جداً واللي هشرحها برضه بالتفصيل عشان مايكونش في مجال لأي أخطاء ..

انا قصدت ان البوست ده بالكامل يكون باللغة العامية لسهولة فهمه وعشان مايبقاش فيه أي كلام تخين على حد فيكوا خصوصاً لو مبتدئ ولسة هينفذ الخطوات دي لأول مرة .

لو حد منكوا عايز يستفسر عن أي حاجة من النقط اللي هتكلم فيها دلوقتي ياريت نركز في البوست ده [بتاع الموقع اللي انت بتقراه دلوقتي مش ع الفيسبوك] لأني بركز في كومنتاته أكتر من الصفحة أو بروفايلي على الفيسبوك لأن هناك الدنيا بتكون زحمة جداً ومنشنات وموال كبير جداً وحاجات كتير بتسقط مني والناس للأسف بتزعل وبتفكرني منفض وانا أصلا مجرد مابكون Online الناس كلها بتكلمني في نفس اللحظة .


شرح تثبيت ريكفري لجميع أجهزة سامسونج أندرويد بأنواعها :

[ad id="2643"]

ملحوظة ## إبعد عن أي برنامج صيني مجهول المصدر زي KingRoot أو KingoRoot أو OnClick Root وبرامج كتير صيني كدة ماتفهمش جاية منين ، ده غير إنها مش هتفيدك أصلا غير إنك تعمل روت بس [ده لو اتعمل] وبتكون دايماً مليانة أخطاء وبتنزلك برامج إجبارية ، ايوة إنت ممكن تحذف البرامج دي بعد كده بس برضه تعتبر طريقة مش مظبوطة وفيها جزء من المجازفة ، فاخلينا في الطرق المعروفة أحسن .

شرح فتح Developer Options في أجهزة سامسونج :

قبل اي حاجة هتحتاج تفعل حاجة اسمها USB Debugging Mode من خلال Developer Options وهتلاقيها في المسار ده : Settings -> Developer Options -> USB Debugging ، عشان تقدر تفتح Developer Options هتدخل على Settings وبعدين About وبعدين Software info Settings وهتضغط على إصدار الكيرنل 7 مرات لحد مايكتبلك You are now a Developer .

[ad id="2644"]

Enable USB Debugging In Samsung

أول حاجة طبعاً عشان تعمل روت لجهاز سامسونج هتحتاج تعريفات تليفونك بكامل أوضاعه التلاتة اللي هما :

  • الوضع العادي
  • وضع الداونلود أو Download Mode أو Odin Mode
  • وضع الريكفري

تعريفات USB لأجهزة سامسونج بنظام أندرويد :

والتعريفات دي هتلاقيها في البوست ده : تعريفات USB لأجهزة أندرويد - دور على نوع جهازك هتلاقي أجهزة أندرويد كلها وفي حالة موضوعنا النهاردة إحنا هندور على تعريفات أجهزة سامسونج للأندرويد ، عشان تدور بسهولة في الموضوع ، من الكيبورد هتضغط على CTRL+F وبعدين هتكتب سامسونج وتدوس Enter .
نزل التعريفات وسطبها على الكمبيوتر .

أو ممكن بطريقة تانية وهي إنك تنزل برنامج Samsung Kies الرسمي من موقع سامسونج من هنا : Download بس عموماً الخطوة اللي فوق دي أسهل ، لأنك لو نزلت سامسونج كايز هتحتاج تحذفه بعد كده عشان نقدر نكمل باقي الخطوات .
[ad id="2644"]


شرح الدخول إلى Download Mode في أجهزة سامسونج :

خلاص نزلت التعريفات وسطبتها وكله تمام ؟ - دلوقتي بقى هات كابل تليفون الأصلي [يفضل يعني] إنما لو معاك كابل تاني بس نضيف او براند كويس زي Remax مثلاً مفيش مشاكل ، منعاً لأي أخطاء ممكن تحصل ، وبعدين ركب تليفونك على الكمبيوتر وسيبه يكمل تعريفاته ، كدة إحنا عرفنا الوضع العادي .

دلوقتي بقى إفصل التليفون من الكمبيوتر ، دلوقتي بقى هنبتدي هنعرف وضع الـ Download Mode او زي ماقولنا فوق Odin Mode - اعمل Shutdown للتليفون خالص ، وبعدين اضغط على أزرار Home + Power + volume down ..

Booting into Download Mode in Samsung Devices

وبعدين هتلاقي ظهرلك الشكل ده : هتختار Continue عن طريق الضغط على زرار Volume up
[ad id="2643"]

Samsung Devices Download Mode

وبعدها بقى تركب التليفون على الكمبيوتر وسيبه يكمل تعريفاته .

أما بالنسبة لوضع الريكفري مش هنحتاج نعرفه لأننا غالباً مش هنتعامل معاه دلوقتي .


كده إحنا عرفنا التليفون بكل الأوضاع اللي هنحتاج نشتغل معاها ، دلوقتي بقى هنبتدي ندور على الريكفري المعدل المناسب لجهاز سامسونج اللي معانا عشان نقدر نعمل الروت .

قبل أي حاجة ## خد Backup من كل ملفاتك وصورك والداتا بتاعتك على جهازك إحتياطي ، وافتكر دايماً قبل ماتعمل أي حاجة لازم تكون عامل حسابك إن في نسخة إحتياطية كاملة من ملفاتك ، ويُفضل طبعاً تكون عامل Sync مع كل اكونتاتك سواء اكونت جوجل او اكونت سامسونج .


تحميل برنامج Odin لعمل سوفتوير أجهزة سامسونج :

دلوقتي هنحتاج حاجتين - اول حاجة هي برنامج Odin اللي هنفلش عن طريقه الريكفري ، وتاني حاجة طبعاً ملف الريكفري المتوافق مع جهاز سامسونج اللي معاك .

برنامج Samsung Odin ده برنامج رسمي من سامسونج بالمناسبة مش مطورين اللي عاملينه ولا حاجة ، حتى وانت فاتح الداونلود مود هتلاقي مكتوب فوق بالاحمر كده Odin Mode وده طبعاً عشان تقدر تفلش من خلاله السوفتوير الرسمي لاجهزة سامسونج بأنواعه سواء الملف الواحد او الــ 4 ملفات .

[ad id="2643"]

دلوقتي برنامج Odin ده إصدارات مختلفة ولازم تاخد بالك من الإصدار اللي هتنزله عشان يكون متوافق مع تليفونك ، يعني مثلا شرح النهاردة بينطبق على اجهزة Galaxy Note 3 - ونسخة أودين المتوافقة معاها هي إصدار 3.07 ، النسخة دي متوافقة برضه مع Galaxy S5 أو Galaxy S4 مثلا - بس مش هتكون متوافقة مع الأجهزة اللي اخدث من Galaxy Note 3 - عشان تتأكد من النسخة الصح لتليفونك إكتب في جوجل نوع تليفونك وجنبه كلمة Odin وهيجيلك النسخة المتوافقة معاه .

روابط برنامج Samsung Odin بإصداراته من هنا
.


ماهو الريكفري المناسب لأجهزة سامسونج بأنواعها :

دلوقتي بقى هتبتدي تدور على الريكفري المتوافق مع جهازك ، أنواع الريكفري المعروفة عموما تلاتة هما : TWRP من فريق TeamWin وريكفري PhilZ - وطبعاً ريكفري CWM - انا شخصياً بفضل TWRP خصوصا إنه متوافق مع كل الرومات المعدلة لأجهزة سامسونج مش زي PhilZ متوافق مع حاجات وحاجات لا ، عشان كده انا هكمل الشرح دلوقتي على ريكفري TWRP - بالنسبة لريكفري Galaxy Note 3 انا اختارت اكتر حاجة مناسبة ومتوافقة مع الرومات بشكل عام سواء رومات فريق سيانوجين أو حتى رومات تاتشويز بأنواعها وهو إصدار TWRP 2.8.7.0 [ركز في الرقم!] .

شرح تحميل ريكفري TWRP من الموقع الرسمي :

عشان تدور على الريكفري المتوافق مع موبايلك هتدخل هنا : TeamWin - TWRP وبعدين من فوق على اليمين هتدخل على Devices وفي البحث هتكتب نوع جهازك - واما تلاقيه ركز في رقم الإصدار ، يعني مثلا Galaxy Note 3 في منه إصدارات N9005 أو N900 أو N900K أو N900T - وكل إصدار منهم ليه ريكفري معين ..
بشكل عام لو جهازك 4G هتلاقي مكتوب جنب إصدار الريكفري Hlte ولو 3G او فيه بروسيسور Exynos مثلا من سامسونج هتلاقي مكتوب جنبه برضه Exynos أو Hl3g .

اما تيجي تعمل داونلود لريكفري TWRP هتلاقي كذا نسخة بكذا إمتداد - إمتداد tar.md5 هو المتوافق مع الأودين


شرح بالصور تثبيت ريكفري معدل لأجهزة سامسونج :

[ad id="2644"]

خلاص نزلت الريكفري وكله تمام ، دلوقتي بقى هتفتح برنامج Odin اللي نزلناه من شوية - هتفتحه كليك يمين و Open As Administrator - وبعدين افتح الـ Download Mode في تليفونك زي ماشرحنا فوق عن - اعمل Shutdown للتليفون خالص ، وبعدين اضغط على أزرار Home + Power + volume down وبعدين هتختار Continue عن طريق الضغط على زرار Volume up ، وبعدين ركب التليفون بكابل USB بتاعه على الكمبيوتر .

في حالة لو تعريفات الـ Download Mode مظبوطة وكله تمام هتلاقي برنامج الأودين شاف تليفونك وعدل رقم Com اللي فوق وكتبلك كلمة Added زي الصورة دي :

طبعاً رقم COM اللي فوق هيختلف حسب عدد الــ USB Devices عندك ، بس بشكل عام لو ماظهرش كده يبقى التعريفات فيها حاجة غلط ، وراجع الخطوات مرة تانية .

[ad id="2644"]

في الخطوة دي عشان نسطب الريكفري - مش هتلعب في اي حاجة ولا تغير أي إعدادات ، هتختار بس الريكفري من خلال خانة PDA أو ساعات بيكون إسمها AP في بعض إصدارات الـ Odin :

 

هنضغط عليها ونختار ملف الريكفري اللي نزلناه في الخطوة اللي فاتت وامتداده tar.md5 زي ماقولنا فوق وهتلاقي البرنامج الأودين كتب كده :

[ad id="2644"]

وبعدين هتضغط Start في برنامج الأودين من تحت - وتستنى ، هتلاقي العملية شغالة على الاودين وعلى موبايلك في نفس الوقت بخط لونه لبني كده كأنه بيعمل داونلود لحاجة ، تمام ده الطبيعي استنى اما يخلص ولو الرسالة دي ظهرت في الأودين يبقى كده كله تمام :

كده مبروك انت عندك ريكفري TWRP معدل ..


شرح عمل روت لجميع أجهزة سامسونج بأنواعها :

أول ملف هنحتاجه هو الــ SuperSU وتقدر تنزله من هنا : SuperSU
.

وبعدين تحطه على ذاكرة تليفونك الداخلية أو الميموري مش هتفرق ، المهم افتكر المسار بتاعه .

شرح الدخول إلى Recovery Mode في أجهزة سامسونج :

دلوقتي بقى هنحتاج ندخل على الريكفري عشان نقدر نعمل الروت بشكل مظبوط ، طريقة الدخول على الريكفري زي طريقة الداونلود مود بالظبط بس الفرق انك المرة دي هتضغط زرار تعلية الصوت ، هتعمل Shutdown للتليفون خالص ، وبعدين اضغط على أزرار Home + Power + volume up .

Booting into Recovery Mode in Samsung Devices

أول مايفتح الريكفري هتلاقي الشاشة دي ، هتختار منهم Install ، هيجيبلك الخيارات بقى اختار إنت ملف SuperSU اللي في الخطوة اللي فاتت :

TWRP Recovery Screen

أول مايخلص تفليش الملف هيجيبلك الصورة دي ، اختار انت منها  “Reboot System” :

[ad id="2644"]

كده إنت تمام ، مبروك بقى عندك روت ، وممكن تتأكد من الموضوع ده عن طريق إنك تنزل برنامج Root Checker من متجر Google Play وتعمل Check Root .


وهنا انتهت أهم وأصعب مرحلة وهي إنك تواجه خوفك وتعمل الروت 😀 - لو انت أول مرة تعمل الموضوع ونجحت فيه ونفذت الخطوات كلها صح ، عايزك تدي لنفسك كريدت وتعتبره إنجاز لأن انا على سبيل المثال خدت فيك وقت كتير وعدت العملية دي مرة واتنين وتلاته لحد ماعرفت انفذها صح وده طبعاً كان من قلة الشروحات اللي بتتكلم عن الموضوع ده بالتفصيل للأسف .

بس في حالة لو انت كده شايف إن بارك الله فيما رزق ومش عايز تعمل حاجة أكتر مع موبايلك ممكن تشوف الموضوع ده واللي بيتكلم عن أقوى وأفضل 50 برنامج ممكن تثبتهم على تليفونك بعد الروت ، صدقني هتستغرب إن ده تليفونك بعد الروت ، إقرا بس الموضوع بتاع البرامج ده وانت حتنبهر من إمكانيات نظام أندرويد بشكل عام 😀 .

[ad id="2643"]


لو عايز تتشقلب في جهازك دلوقتي بعد ماعملت الروت ، أنصحك تبص على البوستات دي :


معادنا دلوقتي بقى مع الناس الفاقدة واللي بايعة القضية وعايزة تخربها وتنزل روم معدلة شبه اللي انا كل شوية اتكلم عنهم واعمل ريفيوز رومات Galaxy Note 3 بطبيعة الحال لأن ده الجهاز اللي معايا ، بس عموماً للناس اللي مهتمة بموضوع الرومات والكلام ده كله ، الشرح هيكون بشكل عام لكل أجهزة سامسونج مع بعض الاختلافات البسيطة اللي هوضحها برضه وانا بكتب الشرح .

شرح تنزيل رومات معدلة / مطبوخة لأجهزة سامسونج :

دلوقتي رومات سامسونج بشكل عام في منها نوعين ، أول نوع هو رومات سيانوجين والتاني طبعاً محبوب الجماهير تاتشويز ..
الفرق بين الاتنين كبير جداً ومفيش مجال لإني اتكلم عنها دلوقتي بس يكفي أقولك إن تاتشويز مثلاً دايما بيديك مميزات في أجهزة أقوى من تليفونك بكتير [طبعاً سوفتوير بس] ، عموماً هو رأي شخصي وممكن ناس كتير تخالفني فيه بس ده مش موضوعنا ..

  • أول حاجة هتحتاجها عشان تقدر تفلش روم معدلة لتليفونك هي الريكفري المعدل سواء TWRP أو PhilZ ، ودول طبعاً تم شرحهم فوق .
  • تاني حاجة ملف الروم ودايماً بيكون مضغوط بامتداد zip .

إنسى برنامج Odin خالص ! - خالص من ساعة مابقى عندك ريكفري مالكش أي علاقة بيه غير في حالة المصايب بس وهبقى اشرحلك فايدته إيه بعد كده .


ملحوظة ## هكرر تاني ## قبل ماتنزل روم معدلة يُفضل إنك تاخد نسخة إحتياطية كاملة بس المرة دي عن طريق الريكفري والــ Backup ده هيكون لكامل السوفتوير الرسمي لتليفونك عشان لا قدر الله حصل أي مشكلة حلها هيكون سهل ، بشكل عام مادام عندك ريكفري معدل معظم المشاكل إن شاء الله بيكون حلها سهل .

شرح حفظ نسخة احتياطية لنظام أندرويد من خلال ريكفري TWRP :

الشرح سهل ويشبه شرح تفليش SuperSU اللي شرحناه فوق مع شوية إختلافات بسيطة ، عموما تابع الشرح بالصور ..

أول خطوة هي إنك هتعمل بوت وتدخل على الريكفري وتختار Backup :

وبعدين هتحدد نفس الإختيارات اللي في الصورة دي وهي ملفات البوت والسيستم والداتا :

هيسألك إذا كنت عايز تسطب برنامج SuperSU - قوله لأ مش عايز 😀 :

[ad id="2644"]

طبعاً بعد ماتضغط Do Not install النسخة الاحتياطية هتلاقيها بتتعمل ، ممكن تاخد وقت يوصل لـ 3 أو 4 دقايق على حسب حجم النظام عندك ، هتستنى اما يخلص وهتلاقي النسخة الاحتياطية دي موجودة في الذاكرة الداخلية عندك في ملف إسمه TWRP/BACKUPS - خده وخليه عندك على الكمبيوتر إحتياطي لأي مشكلة ممكن تحصل مستقبلاً .

شرح إسترجاع نسخة احتياطية لنظام أندرويد من خلال ريكفري TWRP :

دلوقتي بقى لو حبيت تسترجع النسخة الاحتياطية دي تاني لأي سبب هتنفذ الخطوات دي زي الصور ..

أول خطوة هتعمل Power Off لتليفونك خالص وبعدين تدخل على الريكفري وتختار Restore :

في حالة لو واخد كذا نسخة إحتياطية هتلاقي إسم كل نسخة فوق  التاريخ بتاعها ، أما في حالة لو عندك نسخة واحدة بس هتلاقيها أتوماتيك موجودة فوق ، طبعاً لازم تفتكر تحطها في مكانها اللي كانت موجودة فيه في ملف TWRP في الذاكرة الداخلية وعشان تسترجعها هتضغط على Swipe to restore :

[ad id="2644"]

استرجاع النسخة الاحتياطية لنظام أندرويد من خلال ريكفري TWRP ممكن ياخد وقت يوصل لربع ساعه او حتى 20 دقيقة ، ماتقلقش ده الطبيعي استرجاع النظام دايما بيكون أبطئ من إنك تحفظ منه نسخة :

[ad id="2644"]

مجرد مايخلص هتعمل ريستارت وتبوت النظام تاني وهتلاقي كل حاجة رجعت زي ماكانت .


دلوقتي كله تمام وعندك نسخة احتياطية من السوفتوير الرسمي ، دلوقتي بقى تقدر تعدل أو تجرب أي حاجة وانت مش قلقان عشان لو حصل أي مشكلة تقدر بكل بساطة ترجع كل حاجة زي ماكانت زي ماشرحنا في آخر خطوة .

طبعاً بما إن الجهاز اللي معايا حاليا هو Galaxy Note 3 وباقي التيم اللي معايا في الصفحة والموقع معاهم Galaxy Note 4 فا للأسف مش هقدر أفيدكوا في رومات كويسة للأجهزة المختلفة عن الأجهزة دي ، بس عموماً بعد ماتنفذ الشرح والخطوات دي تقدر تجرب براحتك أي روم تعجبك ولو ماعجبتكش ممكن تغيرها وتجرب روم تانية وهكذا ، الموضوع مش صعب ولا حاجة بالعكس شوية التريكات دي موجودة أول مرة بس وبعد كده كل تعاملك مع التليفون هيكون من خلال الريكفري .

اما تيجي تدور على رومات متاحة لجهازك ولا لأ أسهل طريقة هي إنك تكتب في جوجل إسم جهازك والموديل وبعدين جنبها XDA زي كده مثلا : Galaxy Note 3 N9005 XDA - هتلاقي أول نتيجة هي القسم الخاص بجهازك في XDA ، طبعاً انا مش محتاج أنبهك إن كل اجهزة سامسونج شبه بعض واللي بيفرق بينهم حرف أو رقم في الموديل 😀 - خلي بالك من الموضوع ده كويس عشان ماتبهدلش الدنيا ، وعموماً ماتقلقش احنا كده كده عاملين حساب كل المصايب فوق 😀 .

[ad id="2643"]

طبعاً في أي لحظة لو حصلت أي مشكلة مش محسوبة او مش عارف توصل لحل أو لأي سبب عملت حاجة غلط من غير ماتاخد Backup من السوفتوير الرسمي بتاعك تقدر دايماً ترجع للبوست ده وفي حل لمعظم مشاكل اجهزة سامسونج عن طريق تنزيل روم 4 ملفات من برنامج Odin : رومات سامسونج 4 ملفات لإصلاح النظام .

أفضل رومات Galaxy Note 3 N9005 2017 لحد وقت كتابة البوست ده :

ملحوظة ## الرومات مش بالترتيب :

رُبما تُحِب أيضًا
22 تعليقات
  1. david says

    السلام عليكم أخي
    موضوع جميل كالعاده اشكرك واتمنى المزيد من شروحاتك المفيدة
    أخي اذا تكرمت طلبت منك من قبل شرح ال dual boot ياريت لو تشرحه لنا بالتفصيل اذا ممكن لانه موضوع معقد (partions sizes ,slots types etc )
    وجزاك الله خير

    1. Mohamed says

      قريباً أستاذ David إن شاء الله ، عندما أكتب عن أي شروحات أحاول قدر الإمكان أن تكون وافية ومنتهية لهذا تجهيز هذه الشروحات والدروس تأخذ مني وقت ليس بالقصير ..
      المعذرة منك يالطيب على التأخير ، سأحاول إنجازه قدر الإمكان في أقرب وقت إن شاء الله 🙂

  2. عبد المجيد علي says

    جزاك الله كل خير علي الشرح الجميل و الطريقة البسيطة ??? . بس كنت عايز افهم طريقة عمل تحديث للبوتلودر و المودم و امتي بالظبط يعني قبل ما اركب الروم ولا بعده . وطريقة تركيب الروم بتكون من install في الريكفري يعني انزل الروم علي الموبيل في الذاكرة الداخلية و اعمله انستول ولا ايه ولو فيه اضافات زي مثلا ملف البطارية الخضرا بعمله بنفس الطريقة من الريكفري بعد تركيب الروم . معلش بقي اسالتي كتير . جزاك الله خير

    1. Mohamed says

      شكراً على كلامك الجميل أستاذ عبدالمجيد ..
      تحديث البوتلودر والأودين بتبقى من خلال برنامج Odin وده لأجهزة Galaxy Note 3 N9005 ، مش هتفرق تركيبه قبل الروم أو بعده اللي يريحك مش شرط يعني ..
      الروم بتكون في الذاكرة الداخلية او الميموري مش هتفرق ، وبتفلشها من خلال الريكفري من اختيار install ..
      الإضافات زي مود البطارية الخضرا او مودات الصوت او الفيكسات برضه في الغالب بتكون من خلال الريكفري ، في بعض الأوقات بتكون تعديلات يدوية في ملفات السيستم انت اللي بتبدلها ، بس بما إنك مبتدأ خليك أفضل في الملفات اللي بتتفلش من خلال الريكفري ..
      تحت أمرك أستاذ عبدالمجيد في أي وقت او استفسار ، ولو حاجة تانية وقفت في ايدك تعالى في الكومنتات 🙂

      1. عبد االمجيد علي says

        تمت العملية بنجاح الحمد لله ركبت الروم التليفون فعلا اختلف كليا ده انا حبيته 😀 ربنا يكرمكم ويوفقكم يارب مجهووووود رائع منكم والله وسعة صدر لكل الناس جزاكم الله خير .
        في نقطة بس عايز احلها السيتنج مش بتفتح بيطلع رسالة setting has stopped دي ممكن احلها ازاي . والف شكر لحضرتك يا استاذ محمد

  3. عبد االمجيد علي says

    والكاميرا كمان

    1. Mohamed says

      الحمدلله يا استاذ عبدالمجيد إنك قدرت تنفذ الخطوات بسهولة ، دي مهمتنا إننا نسهل على الناس التعامل مع نظام أندرويد بشكل عام ، شكراً لحضرتك على كلامك الجميل 🙂
      ياريت تعمل الكومنت بالمشكلة في بوست الروم اللي قابلت فيها المشكلة دي عشان اقدر أرد على حضرتك لأن كل روم بتختلف عن التانية ..

      1. عبد المجيد علي says

        السلام عليكم
        استاذ محمد انا عملت كومنت في البوست اللي نزلت منه الروم بس حضرتك ماردتش
        والمشكلة اني مش عارف اعمل مكالمات خالص بسبب ان الشاشة بتثبت على صفحى ال log ومش عارف ادخل على السيتنج .
        https://mohamedovic.com/norma-note-7-stable-for-galaxy-note-3/

  4. غير معروف says

    مش لاقى الامتداد ده tar.md5 علي الموقع

  5. ماجد says

    انت استاذ والله كنت حابب بس قبل ما أبدا ف تنفيذ الخطوات دى اتأكد هل انا محتاج اعمل روت للجهاز قبل ما أنزل الركفرى TWRP عن طريق برنامج odin ولا الخطوه دى الاول بنزل الركفرى TWRP عن طريق برنامج odin وبعديها بعمل الروت .

  6. ماجد says

    انا نزلت ال TWRP عن طريق ال جوجل بلاى بش أشتغل عادى هل هناك مشكله لو شيلت app بعد كده ؟؟

    1. Mohamed says

      الـ TWRP مش مجرد برنامج على الموبايل يا ماجد، دي ريكفري معدل كامل بديل للريكفري الرسمي. أول خطوة هي الريكفري ومن خلاله بتقدر تعمل الروت وانا قولت الكلام ده بشكل تفصيلي خلال خطوات الموضوع.

  7. غير معروف says

    اخي منشان الروت وين بدي حط الروت قبل ما اعمل انستال

  8. احمد العنابي says

    ياليت تساعدنا ابغا اسوي روت لجهازي بدون كمبيوتر

    اسم الجهاز
    Galaxy J5 Pro
    رقم الطراز
    SM-J530FD
    وهي رقمي واتس 967735455405

    وتحياتي لك وموافق انشاء اللة اخوك احمد العنابي من اليمن

    1. Mo'ez says

      ما هو نوع وإصدار هاتفك أخي الغالي؟

اترك رد