مشكلة [ Touch Disease] في شاشة أجهزة iPhone 6 & iPhone 6 Plus

مشكلة [ Touch Disease] في شاشة أجهزة iPhone 6 & iPhone 6 Plus

بعض الناس اللي معاها أجهزة ابل iPhone6 & 6 Plus قابلتهم مشكلة Touch Disease في الجزء العلوي من الشاشة وهي خط رمادي لونه خفيف مع توقف اللمس نهائيا في المنطقة دي او ان الاستجابة بتبقى ضعيفة لدرجة كبيرة !

طبعا بما اننا عارفين ان إصدار الأجهزة دي كان في أواخر 2014 يعني عدى عليه سنتين تقريبا ، وناس كتير بالفعل قابلتهم المشكلة دي وهي مش عيب استخدام بالمناسبة للأسف هي مشكلة في التصنيع بس بتظهر بعد وقت من الاستخدام !

في فيديو امبارح من الموقع المعروف iFixit المتخصص ريفيوهات الهاردوير للأجهزة الذكية المختلفة قال فيه إن فيه جهات صيانة مختلفة كتير استقبلت الجهازين وكان فيهم المشكلة دي واللي سماها " Touch Disease " او مرض اللمس - تقدر تبحث بالكلمة على Google ..

طبعا ناس كتير من أصحاب الأجهزة دي راحوا لآبل وكان الرد انهم ماعندهمش اي فكرة عن العيب ده وأنهم مش هيقدروا يعملوا حاجة بما ان الجهاز خارج الضمان !
في ناس قالت إنهم جربوا الضغط على المنطقة دي من الشاشة لو انك " تعملها ثني " بسيط والمشكلة هتتحل بشكل مؤقت بس للاسف هترجع تاني وفي الغالب هتكون على الشاشة كلها واستجابة اللمس هتتوقف نهائيا !

للأسف معظم الحلول في الموضوع ده سلبية .. حتى لو جربت تغير الشاشة كلها حتى المشكلة مش هتتحل لأن المشكلة مش فيها اصلا ، المشكلة موجودة في رقاقة اسمها "تحكم شاشة اللمس" ودي موجودة في اللوحة الأم Logic Board وزي ماقولنا في الاول ده مش عيب استخدام ده عيب تصنيع !

طبعا فريق iFixit اللي اكتشف المشكلة قال إن الحل الوحيد هو تبديل الجهاز أو تبديل البوردة الأم ودي تقريبا تكلفتها قريبة من تكلفته جديد ده غير ان توفرها يكاد يكون مستحيل !

طبعا نصيحة من الصفحة لو حد من اللي معاه الجهازين دول واكتشف ظهور أي أعراض عن Touch Disease والضمان كان ساري يروح يبدله فورا .. ولو كان خارج الضمان للأسف هتضطر تدور على شركة .. وشركة تكون فاهمة هي بتعمل ايه عشان تقدر تبدل الرقاقة اللي عاملة المشكلة ..

أما بالنسبة للناس اللي معاهم أجهزة iPhone6 S & iPhone6 S Plus مفيش اي قلق لأن ابل بالفعل بدلت مكان الرقاقة دي وغيرت تصميم الهيكل الداخلي الإصدار ده بحيث يبقى أفضل وأقوى من الإصدار اللي قبله ..

المصدر : Macrumors