روم MIUI 7.0 بمميزات TouchWiz ونظام Kitkat 4.4 لهاتف جلاكسي نوت 3

Miui v7 rom

أصحاب أجهزة النوت 3 نسخة N9005 إجمعلي هنا
الروم اللي معانا المرة دي هي  Miui v7  وضعها مختلف تماما عن كل الرومات والبورتات اللي فاتت
وفي الغالب ناس كتير جدا عارفاها لأنها تعتبر قديمة من سنة وزيادة خصوصا انها معمولة من نظام أندرويد كيتكات 4.4.2 وده تقريبا العيب الوحيد فيها ...


ناس كتير زي حالاتي كده بتجرب رومات كتير جدا خلال الشهر وبورتات مختلفة أشكال وألوان ومرة Rom Control ومرة أشكال IOS ومرة ومرة ومرة أما في فترة هيجيلك "تخمة" ! ايوة وتزهق مرة واحدة من كل ده وتقول لا خلاص انا هرجع Stock !
بس هترجع وتفتكر أن ال Stock عقيم جدا ومش هيكفي احتياجاتك خصوصا أن معاك تليفون إمكانياته مهولة والاستوك دايما ظالمه !

وهي دي الفكرة في روم Miui v7 - هي Stable وكلاسيك زي الاستوك بالظبط بس في نفس الوقت جمالها أقرب للبورتات اللي متعودين عليها ومش معقدة والبطارية بتاعتها ممكن توصل معاك Stand by ليومين كاملين !
وده لأنها مش حاطة حاجة مالهاش لازمة ولا مميزات كتير مالهاش استخدام لمجرد وجودها بالإضافة إن مطورين شياومي المعتمدين هما اللي مطورينها وده يخليك تتأكد أن فيها أقل قدر من الأخطاء


الروم من تجربتي ليها كأنك بتهرب من زحمة القاهرة او اسكندرية وتروح سيدي كرير

مشكلتها الوحيدة هي أنها كيتكات للأسف ، بس صدقني من شكلها وخفتها هتستغرب
وطبعا بما انها كيتكات خاصية Air Command فيها رجعت للنظام القديم والقلم عموما ناقصه بعض الخواص ..
بس برضه دي حركة تحسب لمطورين شياومي انهم حطوا القلم والبرامج بتاعته المهمة جدا لمستخدمين النوت أو ليا ع الاقل زي برنامج S Note مثلا لأنه دايما مرتبط بواجهة TouchWiz من سامسونج ..

شابوه شياومي بصراحة الله ينور .. ومستنيين بفارغ الصبر Miui v8.0 لاني هيكون مبني على نظام مارشميلو 6.0.1 - هي بالفعل شياومي أعلنت عنه بس لسة مش عارفين إذا كان هيتعمله بورت للنوت 3 زي v7 ولا لا ، بس عموما في بعض المطورين اجتهدوا وعملوا بورت من Miui v8.0 للنوت 3 ومدمج معاه مميزات TouchWiz الجديدة زي اللي في Note 5 و Note 7 بس طبعاً مش هتبقى بقوة رومات فريق مطورين Miui الرسمي



Miui v7 for Galaxy Note 3 screen shots

 


طبعا كلكوا عارفين الخطوات اللي بنعملها كل مرة بس هقولها في نقط بشكل سريع :

– سطب Samsung Android Drivers
– نزل Odin 3.07
– كابل USB 3.0 الأصلي بتاع النوت
– شغل خيار USB Debbuging Mode من خيار Developer Options
– فلش ريكافري TWRP نسخة 2.8.7.0 – من خلال خيار AP في ال Odin
– خد نسخة كاملة من ملفاتك ومن الروم الحالية في حالة لو اول مرة تفلش روم وده من خلال الريكافري
– من الأودين فلش احدث مودم وبوتلودر للنوت [إختياري] - مع الروم دي مش لازم تحدثهم
– اعمل wipe ل System – Data – Cash – Dalvic Cash
– افرد ضهرك ورجلك لأن اول بوت هياخد 20 دقيقة – ماتقلقش ده الطبيعي وفي الغالب مع الروم دي مش هياخد أكتر من 10 دقايق
– إستمتع ..

الروم مفيهاش اي اختيارات هتفلشها من الريكافري وهتبوت علطول - مفيش Aroma
ومليانة مميزات مش هقدر اكيد اتكلم عنها كلها في البوست انت ممكن تكتشفها بنفسك وتيجي تقولنا عليها ..

رابط الروم من هنا : Download - رابط مباشر مساحته 950 ميجا

Enjoy

اترك رد