[شرح] عمل روت Magisk وريكفري TWRP لجهاز Samsung Galaxy S8

النهاردة معانا شرح روت Samsung Galaxy S8 - طبعاً زي محنا عارفين إن أجهزة Samsung Galaxy S8 & S8 Plus هما أحدث أجهزة من سامسونج وفي الغالب الأقوى عالمياً وقعدت شركات كتير في البيت وخليت أجهزتهم شكلها مش لذيذ 😀 - وناس كتير جداً اشتريتهم ومحتاجة تعمل روت وخايفة يحصل مشاكل او تكون أنظمة الروت مش متوافقة او عايزة التحديثات الهوائية OTA ماتضيعش بسبب الروت !

طبعاً مع Mohamedovic مش عايزك تقلق خالص 😀 - أول حاجة طبعاً قبل ماتفكر تعمل روت لأجهزة أندرويد عموماً تشوف الأول إذا كان فيه ريكفري معدل متاح لجهازك ولا لأ - خصوصا لو كان جديد زي أجهزة Samsung Galaxy S8 كده - عشان كده عايزين نقول شكراً لمبرمج XDA المحترم jesec إنه عمل أو عدل ريكفري TWRP متوافق مع أجهزة Samsung Galaxy S8 نسخة Exynos .

روت Samsung Galaxy S8


بسبب بعض حقوق الملكية المتعلقة بشركة كوالكوم وسامسونج - سامسونج طرحت نسخ Samsung Galaxy S8 في الولايات المتحدة الأمريكية اللي بمعالج كوالكوم - بس عالمياً طبعا أطلقت النسخة المتضمنة معالج سامسونج القوي جداً Exynos ، واللي رأيي الشخصي بالمناسبة إنه أقوى كتير من كوالكوم Snapdragon 835 لأول مرة سامسونج فعلا أبدعت في صناعة البروسيسور ده ، عشان كدة الشرح بالكامل على نسخ Exynos - وعلى كل حال كده كده نسخ Exynos هي اللي هتكون متواجدة اكتر من نسخ كوالكوم وهتكون مدعمة من المطورين أكتر عكس معظم أجهزة سامسونج قبل كده .


شرح روت Samsung Galaxy S8 هيكون على الموديلات دي :

  • SM-G950F
  • SM-G950FD
  • SM-G950N
  • SM-G950X

شرح روت Samsung Galaxy S8 نسخة Plus هيكون على الموديلات دي :

  • SM-G955F
  • SM-G955FD
  • SM-G955X
  • SM-G955N

ملحوظة ## : لو مش متأكد من موديل تليفونك بالظبط ممكن تشوفه من هنا : Settings> About device

أجهزة Samsung Galaxy S8 & S8 Plus تعتبر لسة جديدة - وسامسونج لسة ما أتاحتش الــ Kernel Source بتوعهم عشان كده مش هتلاقي ريكفري TWRP موجود بشكل رسمي للأجهزة دي كلها إجتهادات من المطورين - والنتيجة هتكون إنك بطبيعة الحال مش هتلاقي الريكفري شغال بكامل قوته او بكل المميزات اللي انت متعود عليها في أجهزة تانية - بس عموما معظم الوظائف بتاعته شغالة بشكل طبيعي ماعدا ميزة MTP مثلا .


تحذير ## : إنك تعمل روت Samsung Galaxy S8 هتفقد ضمان جهازك نهائياً ، لازم تعرف إنك في النهاية بتجازف على مسؤوليتك الخاصة ، الشرح ده معمول للناس إللي اول مرة تعمل روت خصوصا مع جهاز يعتبر جديد زي روت Samsung Galaxy S8 وحاولت طبعاً قدر الإمكان الشرح يكون سهل وبسيط ومش معقد زي باقي شروحات الروت - الشرح بالكامل اتعمله إختبارات على روت Samsung Galaxy S8 & S8 Plus بس بطبيعة الحال لازم تاخد بالك وتوقع بعض الأخطاء - ## خلي بالك ## : إنك تعمل روت وتفلش ريكفري معدل دي أخطر حاجة ممكن تعملها في أي جهاز أندرويد وممكن بحركة واحدة غلط تفقد جهازك بالكامل ويحصل مثلا حاجة اسمها هاردبريك او طبعاً BootLoop - وعلى كل حال فريق عمل موقع Mohamedovic مش مسؤول عن أي ضرر ممكن تسببه لنفسك بسبب انك ماكنتش مركز في الشرح او بسبب نسيان او عمل خطوة غلط .


الحاجات المطلوبة عشان تقدر تعمل روت Samsung Galaxy S8 :

  • طبعاً أول حاجة جهاز Samsung Galaxy S8 أو S8 Plus نسخة Exynos .
  • اتأكد إن بطارية تليفونك مشحونة كويس ، يُفضل إنها تكون اكتر من 50% .
  • سطب Samsung Android Drivers على الكمبيوتر بتاعك .
  • هتفتح USB Debugging وكمان OEM Unlock . عشان تقدر تفتحهم لازم الأول تفعل خيار إسمه Developer mode وعشان تفتحه هتروح على Settings> About Phone> Software info وبعدين هتنزل تحت شوية على Build number وتضغط عليها تقريبا 7 مرات لحد مايقولك “You are now a developer.” - وبعدين هترجع مرة تانية لــ Settings وهتلاقي بقى فيه خيار جديد ظهر إسمه Developer mode - هتدخل بقى فيه وتفتح USB Debugging وكمان OEM Unlock .

  • أحدث إصدار من برنامج Odin 3.12.3 
  • طبعاً زي ما دايماً بنقول ماتنساش تعمل نسخة إحتياطية كاملة من كل ملفاتك في الذاكرة الداخلية عشان لو حصل اي مشكلة تقدر ترجعها تاني .

الملفات اللي هتحتاجها عشان تقدر تعمل روت Samsung Galaxy S8 :

  • ملف ريكفري TWRP الخاص بنسخة Samsung Galaxy S8 من هنا : Dowload
  • ملف ريكفري TWRP الخاص بنسخة Samsung Galaxy S8 Plus من هنا : Dowload
  • حمل الملف ده هنحتاجه no-verity-opt-encrypt-5.1.zip 
  • وطبعاً أحدث نسخة من برنامج روت Magisk Manager v12.0 هتلاقيها موجودة في اللينك ده : Download

تثبيت ريكفري TWRP على أجهزة Samsung Galaxy S8 نسخة Exynos :

  • إعمل داونلود لنسخة ريكفري TWRP المتوافقة مع جهازك من فوق .
  • إعمل كوبي لملفات دي ( no-verity-opt-encrypt-5.1.zip Magisk-v12.0.zip ) على الميموري بتاعتك - في حالة لو انت مش بتستخدم ميموري - هتسيب الخطوة دي دلوقتي .
  • إعمل Unzip لملف Odin اللي انت دونته فوق وافتح الملف اللي هيطلع .

  • ضغطتين على ملف Odin3.exe عشان تفتح البرنامج .
  • دلوقتي - إطفي تليفونك خالص .
  • إضغط على أزرار Bixby + Volume down وبعدين اضغط على زرار الــ Power .
  • هتلاقي التليفون دخل حاجة إسمها Download Mode - ماتقلقش ده الطبيعي 😀 .

  • اما التليفون يدخل Download Mode - بكابل الــ USB وهتركبه على الكمبيوتر .
  • لو انت سطبت تعريفات سامسونج أندرويد اللي نزلتها من فوق مجرد ماتركب تليفون وانت فاتح برنامج Odin هتلاقي ظهر فيه كلمة Added!! - وطبعاً هتلاقي منفذ COM اللي انت موصل منه متغير لونه برضه فوق زي الصورة كده :

  • دلوقتي هتضغط في برنامج Odin على اختيار AP وبعدين هتختار TWRP recovery.tar او طبعاً على حسب الريكفري اللي عايز تفلشه .
  • في برنامج الأودن من خيار Options - احذف علامة الصح من اختيار Auto Reboot .

  • دلوقتي هتضغط Start - وهتستنى لحد تفليش ريكفري TWRP مايخلص .
  • لو الريكفري اتفلش صح - هتلاقي كلمة PASS منورة بالأخضر فوق البوكس اللي مكتوب فيه COM .
  • دلوقتي تقدر تفصل كابل الــ USB .
  • خلاص فلشنا ريكفري TWRP وكله تمام ؟! - تعالى بقى نعمل روت Samsung Galaxy S8 عن طريق Magisk اللي اتكلمنا عليه بالتفصيل هنا : [شرح] تثبيت واستخدام فيرموير [Magisk Manager] بديل SuperSU وكمان هنا : [شرح] إخفاء الروت على أجهزة أندرويد من خلال Magisk Systemless .
  • دلوقتي بقى هنحتاج نفتح التليفون على recovery mode وده عن طريق إنك تضغط وتعلق على أزرار  Volume Down + Bixby + Power في نفس الوقت - وبعدين اول ماتلاقي الشاشة بقت سودة بسرعة تحرك ايدك على زرار  Volume Up وانت لسة ضاغط على أزرار Bixby + Power - هتفضل ضاغط على الـ 3 أزرار دول لحد ماتلاقي التليفون دخل ريكفري TWRP .
  • أول مايفتح الريكفري هيطلعلك رسالة ، هتختار إنت Keep /system RO وبعدين هتضغط Wipe وبعدين Format Data واكتب yes .
  • دلوقتي هتضغط على Reboot > Recovery 
  • هتضغط على زرار Install في ريكفري TWRP وبعدين شوف انت نزلت الملفات اللي قولنا عليها فوق فين وفلش منهم الملف ده  no-verity-opt-encrypt-5.1.zip خلي بالك لو انت حطيت الملفات دي على الذاكرة الداخلية مش هتلاقيها لأننا لسة عاملين Format Data فوق ، عشان كده قولنا يفضل انهم يتحطوا في الميموري ، بس عموما لو مفيش ميموري ركب موبايلك مرة تانية على الكمبيوتر وانسخ ملفات no-verity-opt-encrypt-5.1.zip و Magisk-v12.0.zip .

  • دلوقتي هترجع للصفحة الرئيسية في ريكفري TWRP وهتختار  Reboot> Recovery .
  • اما الموبايل يعمل reboot ويدخل على الريكافري تاني - هتضغط على زرار Install وبعدين تروح على Magisk-v12.0.zip وتفلشه .
  • دلوقتي فيرموير Magisk Manager v12.0 متثبت على موبايلك وهتلاقي تليفونك متروت وكله تمام المرة الجاية اما تيجي تشغله .
  • أما التثبيت يخلص هتضغط Reboot> system .

مبروك! 😀 - انت دلوقتي عملت روت Samsung Galaxy S8 وريكفري TWRP وكمان فلشت Magisk Manager v12.0 وده قمة الإعجاز العلمي في الروت لحد اللحظة دي 😀 - بس عايز اقولك إن تليفونك لو كنت شاريه بالضمان في الغالب دلوقتي خلاص مفيش ضمان .

دلوقتي بقى أخر خطوة وهي إنك تتأكد إن تليفونك اتعمله Root بدون أخطاء 


إخفاء روت Samsung Galaxy S8 واستقبال التحديثات الرسمية للنظام مع الروت :

وطبعاً اتكلمنا في بوست تاني عن إنك ازاي تخفي الروت بشكل كامل عشان تشغل برامج كتير مش بتشتغل في وجود روت زي سنابشات أو Android Pay مثلا هتلاقيني اتكلمت بالتفصيل الممل عن الموضوع ده هنا : [شرح] إخفاء الروت على أجهزة أندرويد من خلال Magisk Systemless


إنتهى .

المصدر : XDA - DroidViews

2 تعليقات
  1. Muhammad Tolba says

    السلام عليكم و رحمة الله
    اشكرك على شرحك الرائع، لكن هل معنى كلمة format data أن الجهاز هيتفرمت بالكامل ولا دي تخص الملفات المتبقية من التفليش فقط؟ شكرا لك.

اترك رد