[مود] ويدجت الطقس والبحث من Galaxy S8 لكل أجهزة أندرويد | بدون روت
إحنا هنا في Mohamedovic بنحاول نجيب قدر الإمكان أحدث وأفضل مميزات جهاز سامسونج الجديد Galaxy S8 بحيث تقدر تستخدمها في جهازك الأندرويد بدون مشاكل أياً كان نوعه أو إصداره زي بوست النهاردة اللي بيتكلم عن Samsung Galaxy S8 Weather Widget أو مود الطقس والسيرش – أول حاجة كنا جيبناها كانت البرامج الرسمية المسربة لجهاز Galaxy S8 ..
وبعدها برضه عملنا بوست تاني عن الثيم والأيقونات الرسمية لجهاز Galaxy S8 وبعدها بحاجة بسيطة جيبنا خلفيات مسربة بدقة QHD لجهاز Galaxy S8 وبعدين برضه كتبنا بوست عن الرنات والنغمات الرسمية & الخلفيات الرسمية بدقة QHD لجهاز Galaxy S8 والميزة عندنا طبعاً إن الحاجات دي تنفع لأي جهاز أندرويد وبعضها مش هتحتاج Root عشان تعملها اصلا 😀
طبعاً ناس كتير جداً بتدور على Samsung Galaxy S8 Weather Widget بالإضافة لــ Galaxy S8 Google Search Bar عشان شكلهم الجديد والرائع – عجبوني جداً شخصياً بصراحة 😀 – بس للأسف الموضوع ده كان صعب جداً بما إن مود الطقس والبحث دول كانوا حصريين لأجهزة Galaxy S8 بس ! يعني حتى مش هينزلوا كتحديث لأجهزة Galaxy Note 5 أو S7 Edge مثلا ..
طبعاً بعض المطورين حاولوا يجودوا ويجيبوه وفعلا المود اتعمله بورت لبعض الأجهزة زي Galaxy Note 5 وكمان Galaxy S6 بالإضافة طبعاً لجهاز Galaxy Note 3 – بس حتى للأجهزة دي لازم يكون فيه Root وريكافري عشان تقدر تثبت المودات دي !
البوست ده بقى للغلابة 😀 – اللي مالهومش ولا في روت ولا ريكافري ولا يعرفوا يعني ايه الحاجات دي 😀 وفي نفس الوقت نفسهم يجربوا الحركات الجديدة بتاعت جهاز سامسونج الجديد Galaxy S8 ومنها ويدجيت الطقس الرائع ده ..
طبعاً بما إنك عشان تثبت Samsung Galaxy S8 Weather Widget لازم يكون عندك روت ولأجهزة معينة كمان ، بوست النهاردة عن ويدجت [ طبق الأصل ] من ويدجت طقس Galaxy S8 وهنسطبه عن طريق برنامج zooper widgets – وطبعاً الميزة إنك مش هتحتاج ولا روت ولا ريكافري بما إنه مجرد برنامج – بس الشاطر يطلع فرق بينه وبين الأصلي 😀 ..
برنامج zooper widgets ميزته إنك تقدر تلعب فيه براحتك – يعني مش بيجبرك على حاجات معينة لأ فيه فرصة كبيرة للإبداع والتخصيص لأي حاجة انت عايز تعملها بس طبعا لازم تتعلم التعامل مع البرنامج ازاي الأول وان شاء الله انا ناوي اتكلم عنه بالتفصيل الممل في بوست مختلف ..
مود الطقس النهاردة واللي عمله مطور في XDA إسمه thanhtuan1611 واعتمد على النسخة الأصلية من Samsung Galaxy S8 Weather Widget متضمنة الأيقونات والأشكال عشان كدة هتلاقي الويدجت نسخة من Galaxy S8 ومفيهاش اي اختلاف طبعا باستخدام برنامج zooper widgets زي ماقولنا فوق ، المشكلة او العيب الوحيد في الموضوع ده هو انك هتحتاج النسخة الــ Pro من البرنامج واللي اسمها Zooper Widget Pro ومن رأيي [ الذي لا قيمة له ] ان البرنامج يستاهل كل قرش هيتدفع فيه لأنه فعلا قوي جداً وليه إضافات كتير اوي على Play Store ده غير إنك ممكن تتشقلب فيه براحتك ، بس طبعاً إحنا المصريين نتحرق لو اشترينا برامج 😀 – فاهتضطر تدور على نسخة Pro ع النت عشان تقدر تكمل الشرح ..
دلوقتي الملفات اللي هتحتاجها عشان يكون عندك Samsung Galaxy S8 Weather Widget طبعاً بالإضافة لــ Galaxy S8 Google Search Bar هتلاقيها هنا :
شرح تثبيت ويدجيت الطقس والبحث من Samsung Galaxy S8
- طبعاً أول حاجة سطب برنامج Zooper Widget Pro زي ماقولنا فوق .
- ضغطة مطولة عندك على أي مكان فاضي في الــ Home Screen وافتح خيار Widgets .
- هتدور في الآخر على الــ Widget بتاعت برنامج Zooper وتحطها وخلي مقاسها كبير [ هتلاقيها فاضية ماتقلقش ده الطبيعي ] .
- دلوقتي هتعمل Extract لملف Galaxy S8 Weather Widget واللي هيكون إسمه Y.S8_Weather.rar وهتلاقي جواه الملفات هتحطها في المسار ده في ملف ZooperWidget/Templates وهتلاقيه موجود في الذاكرة الداخلية طبعاً بعد ماتسطب برنامج Zooper ، الملفات دي هتلاقيها بإمتداد ZW. .
- هتضغط على الــ Zooper Widget اللي عملناه في خطوة 3 اللي موجود في Home Screen .
- دلوقتي هتختار الذاكرة الداخلية واضغط على اي Widget متوفر .
- عشان تختار المقاسات المظبوطة يُفضل مقاس 2 × 3 عشان هتلاقيه مناسب أكتر ، أما مقاسات 4×1
و 4×2 هتلاقي شكلها مش لذيذ – بس عموما ممكن تكون مناسبة مع بعض الشاشات الكبيرة .
ويدجت الطقس والبحث من Galaxy S8 معمول أتوماتيك وبشكل مظبوط بحيث انك لو ضغطت عليه هتلاقي الطقس اتحدث عادي جداً كأنك معاك الويدجت الأصلي ، بس عموما انت تقدر تغير كل إعداداته بما يناسب استايلك ومزاجك يعني وده المميز فيه ، انت مش مجبر على حاجة او شكل معين ..
مجرد بس ماتتعلم إعدادات برنامج Zooper Widget هتلاقي العملية بقت سهله جداً ، عشان تغير المقاس بشكل سريع انت تقدر تغيره من الويدجت على الــ Home Screen من بره والكلام ده منطبق على ويدجت الطقس والبحث ، أما بقى لو عايز تغير الإعدادات نفسها هتفتح من البرامج برنامج Zooper Widget وتضغط Configure وبعدين تختار الويدجت اللي انت عايز تعدله وهتلاقي خيارات لكل حاجة ممكن تتخيلها وانت ودماغك بقى 😀 .
المصدر : XDA