أفضل تعديلات ملف Build.Prop لتغيير جهازك الأندرويد بشكل رائع!

إزيكوا يااولاد 😀 - زي ماقولنا قبل كده في بوست [شرح] تعديلات ملف build.prop وإنه ملف واحد بس أهم ملف في نظام أندرويد كله ومبني عليه قواعد كتير خاصة بالنظام زي مااتكلمنا بالتفصيل وقولنا إنك من خلال تعديلات ملف Build.Prop هتقدر تغير حاجات كتير جداً في جهازك مش متاحة من خلال البرامج - الملف كله حركات وتريكات بس طبعاً مش هيقدر يعملها غير اللي يعرف يتعامل مع البرنامج عشان كده مهم جداً تقرا البوست اللي فات عشان تقدر تتعامل مع تريكات الملف ده اللي هنشرحها النهاردة بالتفصيل .


20 تعديل خرافي في تعديلات ملف Build.Prop

بوست النهاردة هنشرحلك بالتفصيل الممل إزاي تعمل 20 تغيير في الملف ده واللي هيخلوا تليفونك يتغير 360 درجة أياً كان موديله أو نظامه لأن في الآخر معظم الأجهزة اختلافها بيكون في الواجهة بس زي TouchWiz من سامسونج أو Sense من HTC مثلا ، إنما الأساس هو إن كلهم بنظام أندرويد و تعديلات ملف Build.Prop مابتختلفش كتير في الاجهزة دي ، يعني من الآخر نفذ الشرح وانت مش قلقان إن جهازك يكون مش متوافق :D


  • أول تريكاية هي إنك ازاي تخلي موبايلك يرن مجرد ماتوصلك مكالمة - نظام أندرويد في الطبيعي بيستنى 3 او 4 ثواني قبل مما موبايلك يرن لو جيلك اتصال عشان يعمل تأكيد للإتصال او حاجة اسمها verify a connection قبل موبايلك مايبتدي يرن ، الــ Tweak ده هيعمل Disable للحركة دي واللي انا شايف ان مالهاش 30 لازمة 😀 وهيخلي تليفونك يرن في لحظة مايجيلك اتصال [ الانتظار ده مش كتير بالمناسبة ] بس عموما لو حبيت تلغيها ممكن تضيف السطرين دول تحت بعض في أخر ملف Build.Prop .
ro.telephony.call_ring.delay=0
ring.delay=0

حل مشكلة built-in error reporting

  • ساعات اما تنزل بعض أنواع الرومات بيبقى فيه شوية مزايا مش متوافقن مع نوع موبايلك او اخطاء معينة في حاجات انت اصلا مش بتستخدمها ، ورسايل الأخطاء ممكن تطلعلك كل ثانيتين ومش بتديك فرصة حتى تحل المشكلة ، الحركة دي اسمها built-in error reporting وعشان تلغيها هتضيف السطرين دول في آخر ملف Build.Prop .
    profiler.force_disable_err_rpt=1
    profiler.force_disable_ulog=1

مشكلة الشاشة السوداء بعد انتهاء المكالمة في تعديلات ملف Build.Prop

  • أكيد لاحظت مشكلة الشاشة السوداء بعد انتهاء المكالمة لمدة ثواني خصوصا لو انت هاوي رومات معدلة هتلاقي ان العيب ده موجود في رومات كتير جداً ، للأسف ده مش عيب روم !
    ده عيب في حساس إسمه proximity sensor وده السيسنور المسئول عن إنه ينورلك الشاشة بعد ماتشيلها من على ودنك ومش بيشتغل بكامل آداءه غير على الرومات الرسمية ، بس عموما عشان تقدر تحل المشكلة دي ، دور على السطرين دول في ملف Build.Prop وعدلهم زي كدة بالظبط :
ro.lge.proximity.delay=25
mot.proximity.delay=25

إتاحة دوران الشاشة في Lock screen

  • طبعاً كتير مننا بيحب يمسك التليفون بالعرض حتى وهو على الــ Lock Screen بس للأسف الحركة دي ماتنفعش غير على لانشرات معينة زي Nova Launcher مثلا - انما على Samsung TouchWiz الموضوع ده يعتبر مستحيل ، طبعاً بالإضافة لأجهزة التابلت موضوع الــ Lock Screen بالعرض بتيجي فيها بشكل إفتراضي ..
    عموما لو حبيت تفعل موضوع دوران لوك سكرين ضيف السطر ده في آخر ملف Build.Prop :
lockscreen.rot_override=true

إتاحة دوران الشاشة في Home screen

  • طبعا الخطوة دي تعتبر نفس الخطوة اللي فوق بس مع اختلاف السطر اللي هيتضاف ، عموما لو انت على لانشر مختلف زي ماقولنا فوق الحكاية دي مش هتبقى مشكلة وفي الغالب هتلاقيها متاحة ، بس لو انت على الواجهة الرسمية وعايز تتيح دوران Home Screen  ضيف السطر ده في نهاية ملف Build.Prop :
log.tag.launcher_force_rotate=VERBOSE


تقوية وتحسين إتصال الإنترنت في نظام أندرويد

  • سامعك يللي معترض 😀 - بس اسمعني للآخر الأول !
    هنا إحنا مش بنعلي سرعة الإنترنت زي منتا فهمت ، لا إحنا بنعمل حاجة اسمها Improve أو تحسين لسرعة الإنترنت والتصفح وده عن طؤيق تغيير الــ DNS اللي بيكون موجود إفتراضي مع كل أجهزة أندرويد وساعات بيتغير على حسب شريحة الإتصال اللي موجودة في موبايلك زي فودافون او موبينيل او اتصالات مثلا ، طبعاً لو انت عامل روت تقدر تغير الــ DNS ده بسهولة - او حتى من غير روت تقدر تغيره بس هتعدله في برنامج برنامج ، بس عموما ليه تستخدم برامج وانت ممكن تغير في ملف بيلد بروب علطول ؟!
    طبعا الــ DNS اللي هنستخدمه بتاع Google واللي اعتقادي الشخصي مفيش أقوى منه خصوصا إنه جي بشكل مجاني تماماً 😀 - عشان تقدر تستخدم Google DNS services هتضيف السطرين دول في نهاية ملف Build.Prop :
net.dns1=8.8.8.8
net.dns2=8.8.4.4

تحسين الــ Scrolling

  • مش ساعات كده وانت ماسك موبايلك وبتقلب في البرامج او الجاليري لو النت فاصل وانت قاعد زهقان تلاقي ساعات في سنة Lag او نتشة كده 😀 - ده مش بسبب موبايلك ومواصفاته القليلة - ده بسبب إن نظام أندرويد بيعمل Limits للأنيميشن وانت شغال عليها عشان يحافظ على البطارية من قوة البروسيسور ، عموما عشان تلغي الموضوع ده او تعدله او حتى تخليه أبطأ ممكن تعدل على الكود ده وتضيفه في نهاية ملف Build.Prop :
windowsmgr.max_events_per_sec=150
ro.min_pointer_dur=8 ro.max.fling_velocity=12000
ro.min.fling_velocity=8000

تحسين وتقوية جودة المكالمات

ro.ril.enable.amr.wideband=1

تشغيل أو إيقاف Navigation keys

  • أزرار الرجوع والخيارات أو Navigation keys بتبقى موجودة بشكل فعلي في بعض الأجهزة زي سلسلة S أو نوت من سامسونج مثلا ، وفي بعض الأجهزة بتبقى On-Screen زي أجهزة HTC ..
    عموما لو حبيت لأي غرض توقف شغل الأزرار دي خالص ممكن تضيف السطر ده في ملف Build.Prop السطر اللي فوق رقم 1 عشان تعملهم إيقاف ولو حبيت تشغلهم تاني خلي رقم 1 ده 0 :
qemu.hw.mainkeys=1
qemu.hw.mainkeys=0

تغيير Screen DPI لتكبير أو تصغير الخطوط والأيقونات

أنا واحد من الناس مابحبش الأيقونات والخطوط الكبيرة - حتى اما بختار أصغر خط عن طريق خيارات Display بتبقى الخطوط صغيرة أيوة بس للأسف مش بتكون متناسقة خالص مع حجم الأيقونات وده لأني بصغر الخط لوحده ، إنما لو غيرت في الــ DPI انت كده بتغير مقاسات وأبعاد الشاشة كلها متضمنة كل حاجة فيها حتى حجم أيقونات Stutsbar مثلا - وفي نفس الوقت في ناس بتحب الحاجة الضخمة مالناش دعوة 😀 - عموماً لو حبيت تلعب في الــ Values بتاعت الــ DPI - هنقولك ازاي تحت ..معظم الناس فاكرة ان الــ DPI تغييره هيفرق في مجرد حجم الأيقونات والخطوط بس - لا في الحقيقة إنت غلطان ، تغيير الــ DPI كمان هيفرق في مستوى وآداء نظام أندرويد على موبايلك بشكل عام يعني مثلا كل اما كبرت رقم الــ DPI هتلاقي الأيقونات والخطوط والــ UI بشكل عام بقى أصغر بس خلي بالك ## كل ده على حساب البروسيسور لأنه بيبذل مجهود أكتر في إنه يخلي الشاشة تديك بيانات أكتر وآداء أقوى ## يعني لو تليفونك تعبان بالبلدي بلاش تعلي الــ DPI - عموما جرب وانت الحكم ..

[ad id="2643"]
في نفس الوقت لو قللت رقم الــ DPI هتلاقي برضه الأيقونات والخطوط والــ UI كله بقى أكبر وده برضه زي ماقولنا فوق كأنك بتعمل boost للنظام لأنك قللت الجهد على البروسيسور وخليته يعالج بيانات بشكل أقل وداتا أقل ..## خلي بالك ## حاول ماتلعبش كتير في أرقام الــ DPI لأنك لو عملت رقم عالي أوي او واطي أول ممكن ماتعرفش تتعامل مع تليفونك أساسا لأنك لعبت بغباوة في الــ Values بتاعت الــ DPI لإي الحالة دي هتضطر ترجع ملف Build.Prop الأساسي عن طريق الريكافري زي ماقولنا في بوست [شرح] تعديل ملف build.prop في معظم أجهزة أندرويد ( البوست ده مهم جداً بالمناسبة ركزوا فيه كويس قبل أي تعديلات عايزين تعملوها في ملف Build.Prop ) .في العادي الــ Values المتوافقة مع معظم الأجهزة بتبتدي من 160 مروراً بـ 320 ، 480 ، 640 وهكذا - لاحظوا إننا كل مرة بنزود قيمة 160- محدش ذكي يروح يحط القيمة دي 250 وييجي يقولي يالهوي الحقني بلاش الحاجات الغريبة دي الله يباركلكوا 😀عموما عشان تغير الــ DPI في اخر ملف Build.Prop هتضيف السطر ده وتعدل الــ Value اللي انت عايزها مكان XXX :

ro.sf.lcd_density=XXX

 تحسين وتقوية الكاميرا ومعالجة الصور في تعديلات ملف Build.Prop

  • معظم أجهزة أندرويد - حتى الكاميرا القوية منها زي S7 Edge مثلا الصورة بتكون باينة في الكاميرا وانت بتصور قوية جداً بس بعد ماتصور بتلاقي الصورة جودتها قلت عن ما كنت بتصور ! ، ماتقلقش الكاميرا بتاعتك مش وحشة بس نظام أندرويد عشان يحافظ على البطارية وحرارة التليفون بيعمل ريندر للصور على كواليتي قليل للأسف (هي في المجمل كواليتي كويسة بس التليفون يقدر يديك أعلى) - هو بيعامله في الآخر على إنه تليفون مش كاميرا DSLR !عشان تحل المشكلة دي وتخلي التليفون يديك أعلى وأقوى آداء في معالجة الصور [ لو انت شايف إن البروسيسور بتاعك قوي ويستحمل الحركة دي ] هتضيف السطر ده في آخر ملف بيلد بروب :
ro.media.enc.jpeg.quality=100

تعديل وقت البحث عن شبكات WiFi المتاحة - تعديلات ملف Build.Prop

  • نظام أندرويد في العادي بيعمل Scan لشبكات WiFi كل 15 ثانية - حتى وانت عامل Connect لشبكة معينة لو في بيتك مثلا ، الموضوع ده للأسف بيستهلك البطارية بشكل مش طبيعي لأنه بيدور على الشبكات المتاحة حواليك باستمرار ، طبعاً الموضوع ده مفيد في حالة لو انت في مكان في شبكات WiFi كتير او بيتك كبير وفيه كذا Access Point أو في مطار مثلا ..
    [ad id="2642"]

    إنما لو انت في بيتك ومفيش غير شبكتك في معظم الأوقات تقدر تعدل موضوع الــ 15 ثانية ده عشان حتى على الأقل تحافظ على البطارية وبرضه تقلل الجهد على البروسيسور ..في حالة لو حبيت تعديل القيمة دي هتدور على الكود ده في ملف بيلد بروب وتعدله بالقيمة اللي انت عايزها - يعني مثلا لو عايزه يدور على شبكات WiFi كل دقيقتين هتخلي الــ XXX دي 120 ثانية - أي رقم هتحطه بيكون بالثواني :
wifi.supplicant_scan_interval=XXX

تسريع عملية الــ Restart أو الــ Boot بشكل عام

  • ببساطة ضيف الكود ده في آخر ملف بيلد بروب عشان تخلي عملية البوت أسرع من العادي ومفيش منها أي ضرر [ بس في النهاية برضه هي بتعتمد على الهاردوير عندك سواء البروسيسور أو الرامات] :
ro.config.hw_quickpoweron=true

تعديل إضاءة أزرار Back-lit

  • أزرار الخيارات والرجوع أو Back-lit Capacitive Keys زي اللي في أجهزة Galaxy Note أو Galaxy S في الحالات العادية مش بتننور غير اما تضغط عليهم ، في حالة لو انت عايزهم منورين طول مالشاشة منورة هتدور على الكود ده وتعدله زي كدة ولو عايز ترجعهم زي ماكانوا غير رقم 0 وخليه 1 :
ro.mot.buttonlight.timeout=0

تقوية وتحسين الشبكات والـ Mobile Data

  • في تعديلات ملف Build.Prop الــ Tweak دي هتخلي التليفون يخرج بره الــ Dormancy أو فترة السكون بسرعة - يعني لو انت في مكان مفيهوش شبكة وطلعت في مكان فيه شبكة عشان تعمل مكالمة مثلاً التليفون في العادي هياخد وقت عشان الداتا مرتبطة بكل البرامج اللي عندك على الموبايل وبيوصل خدمة الــ Data لكل أجزاء التليفون - عموما عشان الحركة دي تشتغل كويس لازم يكون تليفونك في العادي بيدعمها طبعا بالإضافة لتقنية وتردد الشبكة ، عموما عشان تشغلها هتضيف السطرين دول في أي حتى في ملف بيلد بروب :
persist.cust.tel.eons=1 
ro.config.hw_fast_dormancy=1

إيقاف تنبيه وإشعارات USB Debugging

persist.adb.notify=0

إتاحة دوران البرامج والألعاب بزاوية 270 درجة

  • إحنا اتكلمنا في Auto Rotate Tweak فوق على اللوك اسكرين والهوم اسكرين ، بس بعض البرامج مش هتقدر تعمل فيها نفس الحركة دي ، بس في الــ Tweak دي هنعمل زي Force ليها عشان تسمع كلامك وتدور معاك لو قلبت التليفون 😀 - هتضيف السطر ده في تعديلات ملف Build.Prop :
windowsmgr.support_rotation_270=true

حل مشكلة إيقاف الواجهة وتحميلها مرة تانية

  • بعض أجهزة أندرويد عشان تساعدك في التحكم في الرام بشكل أفضل بتعمل حركة الغبية أوي وهي انها دايماً تقفل البرامج اللي شغالة في الخلفية حتى لو منها الواجهة او الــ Launcher اللي انت بتتعامل معاه ! - المشكلة في الحكاية دي لو انت مثلا بتعمل حاجة وحبيت ترجع الــ Home تاني هيحمل من أول جديد والموضوع ده رخم جداً خصوصا لو بتتعامل مع واجهة تقيلة ومميزاتها كتير زي TouchWiz مثلا في أجهزة سامسونج ، عشان تحل المشكلة دي في تعديلات ملف Build.Prop ضيف الكود ده في ملف Build.Prop ، الكود وظيفته إنه مايخيليش اي برنامج يقفل الواجهة خالص طول منتا مش فاتحها :
ro.HOME_APP_ADJ = 1

تقوية وتحسين الرزليوشن في صور بانوراما

في معظم أجهزة أندرويد اما تيجي تصور صورة بنظام بانوراما بتبقى على الأقل 5 او 6 صور وبيتعملهم دمج مع بعض في صورة واحدة ، وعشان الليميت اللي البروسيسور بيعمله على الكواليتي بتاع الصور زي ماقولنا فوق للأسف لو جيت تعمل زووم في صورة البانوراما هتلاقيها  بكسلت حتى لو الكاميرا بتاعتك قوية !
[ad id="2644"]

في تعديلات ملف Build.Prop الــ Tweak دي انت هتعمل Force للبروسيسور إنه يعمل ريندر لصورة البانوراما بكامل جودتها وكامل قوة الكاميرا بتاعتك [ مش كل التليفونات بتدعمها ] [ هيكون جهد زيادة على البروسيسور لأن الصور بنظام بانوراما بتبقى كبيرة جدا وفي بعض الأحوال بتعدي الــ 100 ميجا ] - عشان تنفذ الــ Tweak دي هتضيف السطرين دول في ملف بيلد بروب :

ro.media.panorama.defres=3264x1840
ro.media.panorama.frameres=1280x720

إيقاف خاصية Android logger – log-cat

  • نظام أندرويد في العادي بيعمل ملفات Log ومتابعة مستمرة لكل حاجة انت بتعملها على السيس او البرامج بشكل عام - عشان لو قابلتك مشكلة في وقت من الأوقات تقدر تبص في ملف الــ Log ده وتعرف المشكلة او الــ Error ده جه منين ..
    بس لو انت مش Developer او مالكش في المواضيع دي أعتقد انك مش مستفيد أي حاجة من الموضوع خصوصا إنه جهد على البروسيسور والبطارية بدون أي داعي ..
    عشان تلغي الميزة المزعجة دي ممكن تضيف السطر ده في ملف Build.Prop :
logcat.live=disable

إحنا كدة خلصنا أهم تعديلات ملف Build.Prop - متهيقلي دي أكتر الــ  Build.Prop Tweaks اللي الناس بتدور عليها وهي تعديلات جميلة ولذيذة بالمناسبة ولو نفذتها كلها صح هتحس ان تليفونك اتغير فعلا - طبعا زي مانبهت فوق أهم حاجة تراجع بوست طريقة وشرح تعديلات ملف Build.Prop كويس جداً ، اقراه كذا مرة وركز فيه عشان تقدر تتعامل مع التريكات اللي قولناها فوق دي - وطبعاً يفضل إنك تتعامل مع التعديلات دي كلها ببرنامج Build.Prop Editor منعاً لأي خطأ ممكن يحصل وعموما احنا في البوست اللي فات شرحنا ازاي تخرج من اي مشكلة تقابلها وازاي ترجع الملف الأساسي مكانه تاني وتلغي أي تعديلات انت عملتها ..
[ad id="2643"]
الشرح انا حاولت يكون سهل وبسيط قدر الإمكان بس عموماً لو في نقطة مافهمتهاش أو عندك إستفسار عن أي جزئية في البوست تعالى في الكومنتات .

8 تعليقات
  1. tamer says

    ابدعت /// شكرا

    1. Mohamed says

      شهادة حضرتك وسام أستاذ تامر ..
      منورنا 🙂

  2. غير معروف says

    لو سمحت ينفع اعمل الخطوات دي من غير روت وببرنامج التعديل بس

    1. Mo'ez says

      لا للأسف لأن برنامج بيلد بروب اصلا بيحتاج صلاحيات الروت عشان يشتغل

  3. Ahmad says

    خيال يا محمدوفيتش شغل عالي ومجهو جميل بس ياريت تعمل موضوع بكل التعديلات ايا كانت

    1. أبو مُعِز says

      الاول الف شكر ليك ياابو حميد منورنا
      اما ثانيا، مستحيل اعمل موضوع بكل تعديلات بيلد بروب لأنها مش محدودة، بس عموما هحاول كل ماالاقي تعديل مفيد وكويس هضيفه هنا.

  4. Hussein says

    طب هو ينفع اعدل الإصدار من خلال build.prop

    1. أبو مُعِز says

      أيوة ينفع يا حسين

اترك رد