شرح تعديل ملف build.prop في معظم أجهزة أندرويد (تتطلب روت)

إزيكوا يا ولاد 😀 – البوست ده مهم جداً بالنسبة للــ[ Geeks ] إللي زي حالاتي وبيحبوا يعدلوا كتير او يعملوا مودات عموماً لأجهزة أندرويد ، أكيد عدي عليك ملف build.prop – الملف ده بقى مكانه في ملف /system/ وطبعاً ماتقدرش تشوفه غير في حالة لو عامل root وبتستخدم Root Explorer ..

الملف ده بقى فيه أسرار تعديل كتير جداً في نظام أندرويد عموما بغض النظر عن موديل جهازك أو الشركة المصنعة او حتى إصدار نظامك – هو زي قاعدة أساسية أو Basics مبني عليها نظام أندرويد وبيكون فيه كل معلومات جهازك ونظامك زي اللي بنشوفها في Software info مثلا زي اسم الكيرنل والروم وإصدار نظام أندرويد وكدة ، طبعا انت مش من الطبيعي انك تلعب فيه ، بس عادي احنا مش من الطبيعي اننا نلعب في اي حاجة يعني 😀 .


ملف build.prop بيبقى فيه معظم إعدادات النظام – سواء اللي بتغيرها البرامج اللي بتطلب صلاحيات الــ Root زي مثلا إنك تغير الــ DPI أو تغير الــ Icon Pack أو حتى تعمل Root أو حتى اللي انت بتغيرها في الإعدادات زي حجم الخط او الحاجات العادية المشابهه ليه واللذيذ بقى إنه متاح فيه حاجات مش موجودة حتى في التعديلات العادية ولو موجودة بتكون صعبة ، التعامل معاها هيكون أسهل بكتير من خلال ملف build.prop بس طبعا زي ماقولنا فوق هتحتاج أي برنامج يكون معاه صلاحة تصفح ملفات الــ Root لأن البرنامج مكانه يعتبر في جذور السيستم وهنشرح في الخطوة الجاية ازاي بالتفصيل .

## تحذير بس ## ملف build.prop مهم جداً في أنظمة أندرويد عموماً وتعديله مجازفة كبيرة ، وأي تعديل مش محسوب أو بدون علم فيه ممكن يلبسك الــ Bootloop المتين [كلمة Bootloop معناها ان جهازك يعلق على اللوجو]طبعاً مش محتاج أقول إننا مش مسئولين عن اي حاجة غلط انت ممكن تعملها – في النهاية ده قرارك إحنا مجرد ناس بنديك معلومة وشوية تريكات 😀 – عايز تكمل إنت حر ##


تعديل ملف build.prop عن طريق File Explorer

عشان تقدر تعدل ملف  build.pro هتحتاج حاجتين وهما : Text Editor عشان تقدر تفتح الملف وتعدله وطبعا زي ماقولنا فوق متصفح ملفات مع صلاحيات تصفح ملفات النظام او Root Explorer – عموما معظم متصفحات الملفات بيكون مدمج فيها Text Editor وتقدر تستخدمه بس في النهاية دي حرية شخصية لو بتدور على مميزات معينة في برامج مختلفة مثلا – على العموم لو انت مش عندك Text Editor مفضل انت مش لازم تنزل واحد منفصل وممكن تستخدم اللي بيكون مدمج مع متصفح الملفات زي  Root Explorerأو Solid Explorer أو  ES File Explorer وده اللي انا بفضله بشكل شخصي يعني ، بس عموما دول أفضل وأشهر 3 متصفحات ملفات موجودين في Google Play والشرح ممكن يتنفذ على أي واحد منهم .

طبعا زي ماقولتلك فوق إني بفضل Es File Explorer Pro فهو ده اللي هستخدمه والشرح هيتم عليه وهتلاقوني بستخدمه في شروحات كتير تانية لأنه برنامج رائع وسهل وسلس الحقيقة ..

طبعا عشان تدخل ملفات Root هتروح لمسار /system/ – وهتنزل تحت شوية هتلافي ملف build.prop هتضغط عليه وهتختار تشغيله بــ ES Note Editor أو أي برنامج تعديل كتابة تاني انت تفضله – العملية مش هتختلف كتير ..

  • اتأكد إن السيستم بتاعك قابل للقراية والكتابة او Read/Write .
  • في برنامج ES File Explorer – هتطلع فوق خالص على الشمال واضغط على الــ 3 خطوط تحت بعض دول أو الـ Menu Drawer عشان تفتح خيارات البرنامج .
  • إنزل تحت لحد ماتلاقي كلمة Root Explorer وهتلاقيها تحت خيار Tools – إضغط عليها لو ماكانتش جاهزة واسمحلها بصلاحيات الروت واضغط Allow .
  • إضغط على قايمة  Root Explorer عشان تفتح الإعدادات بتاعته وبعدين اختار Mount R/W .
  • دلوقتي هتروح لــ System – وهتختار علامة الراديو على اليمين في الويندوز اللي هتظهر ساعتها .

## قبل ماتبتدي تعديل في ملف build.prop ## خد نسخة إحتياطية من الملف الأصلي قبل التعديل وحطه في أي مكان تاني – أو ممكن تاخده كوبي وتعمله Rename وتسيبه في نفس المكان ، بحيث او عملت حاجة غلط او حبيت تجرب في كذا حاجة او حصل Bootloop تقدر ترجع الملف قبل التعديل في أي وقت من خلال الريكافري ، بالطريقة دي انت مش هتكون قلقان وانت بتتابع الشرح .


تريكات :


تعديل ملف build.prop عن طريق برنامج Build Prop Editor

إنت ممكن كمان تريح دماغك من كل الهري اللي احنا قولناه فوق ده 😀 – وتنزل برنامج Build Prop Editor  – وهو اصلا برنامج شغلته الوحيدة تعديلات ملف build.prop – التعامل مع البرنامج ده هيخلي العملية أسهل بكتير جداً لأنه في النهاية معمول اصلا عشان كدة بس ..

BuildProp Editor‏
Price: Free

الموضوع ببساطة شديدة جداً عشان تعدل في ملف build.prop عن طريق البرنامج هو انك هتختار الــ Line أو الـ Value اللي عايز تعدلها – وبعدين تضغط Save .

  • من المميزات القوية جداً في البرنامج إنه بيسألك قبل التعديل في اي حاجة اذا كنت عايز تاخد نسخة احتياطية من الملف الأساسي ولا لأ .
  • تقدر كمان تعديل ملف build.prop بالكامل مرة واحدة زي تعديلات الكتابة العادية .
  • هيخليك تقدر تكبر الخط او تصغره عشان تبقى مرتاح وانت بتتعامل معاه – في النهاية انت بتتعامل مع مجرد أكواد مش صور 😀 .
  • تقدر تعمل Search على كود او Line معين .
  • اما تعدل او تضيف أرقام في كود معين هيغيرلك لونه عشان تبقى عارف ان ده اتعدل اما تيجي تراجع تعديلاتك قبل ماتعمل Save .
  • ومميزات كتير جداً في التعديلات دي هسيبك تكتشفها بنفسك .

الخاتمة

لو حبيت تعدل ملف build.prop كمبتدأ لازم يكون معاك برنامج يساعدك ، انا عن نفسي بستخدم زي ماقولت فوق ES File Explorer بس الفكرة اني بكون عارف بالظبط انا رايح فين وبعمل ايه ، بس برضه اما شرحتلكوا طريقة التعديل من خلاله بالتفصيل الممل ..

عموما ## انا عن نفسي مش بفضل إني أغير او أعدل في الملف ده إلا اذا كانت حاجة ضرورية وقسوى كمان لان التعديلات فيه قائمة على المجازفة زي ماقولت قبل كده ..

خلصت الشرح ؟ فهمته كويس ؟ تعالى بقى واتعلم حركات تعديل ملف build.prop كويس في البوست ده 😀 : [تريكات] تعديلات ملف Build.Prop لتغيير جهازك الأندرويد بشكل رائع!

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى