روم | Galaxy Note 3 | Possible FS4 | بورت A5 2017 بخواص S8 & Note 8

إزيكوا يا ولاد  – معانا النهاردة روم Possible FS4 لأجهزة Galaxy Note 3 إصدارات N9005. ومعاكوا الآن أبو معز ومؤمن بالإضافة لمريم آخر العنقود، عشان اللي هيسألني يقولي فين روماتك ياابو معز هنفخه ?? – انا بقالي 5 سنين مانمتش يااخوانه ? رفقًا بالأبهات الله يباركلكوا ??.

بس برضه انا ماكنتش ناسيكوا، وفي الفترة اللي فاتت جربت كذا روم جديدة وماكانوش يستحقوا الكلام عنهم متضمنين روم Magma VX1 بالإضافة لروم تانية اسمها QS بورت Note 7 من موقع صيني ومعاهم كمان الاصدار الأقدم من الروم دي اللي هي فيرجن FS3.

مش عارف بقالي فترة بدور على الإستقرار بصراحة ومابقيتش احب اجرب رومات جديدة كل شوية عشان الموال اللي بيتعمل بعد كل روم زي منتوا عارفين، ده غير إني حرفيا مش بكون فاضي وبسبب كدة ممكن افضل مستمر بروم مش حلوة لأسابيع يعني خصوصا بعد الفترة الاخيرة الرومات فعلا مابقاش فيها أي جديد وكلهم بلا استثناء للأسف بيستنزفوا البطارية بشكل مستفز ومبالغ فيه.

روم Possible FS4 لأجهزة Galaxy Note 3

بس الوضع ده اختلف مع روم Possible FS4 وهي الاصدار الرابع من بورت Galaxy A5 2017 اللي عامله العبقري الفيتنامي BMG “واللي بالمناسبة مبني عليه اصلا معظم رومات A5 اللي على الساحة” إبتداء بروم N2O V5.0 بتاعت حمزه ومرورا بكل إصدارات روم Mazenger بالإضافة لروم إيفوريا الاخيرة واللي لعب فيها مازن عصام ماتش اعتزاله.

“مازن ضمن مطورين الصفحة بالمناسبة ودي كانت آخر روم ليه لانه اشترى iPhone الفاجر وبقى فان بوي مالناش دعوة بيه ??

كنا اتكلمنا قبل كدة وقولنا ان المستقبل في الرومات بشكل عام هيكون لبورتات A7 او A5 بالإضافة ل C9 او C7 – وده لأنهم لسة بينزلهم تحديثات أمنية من سامسونج لحد النهاردة “التحديثات مش بتكون في إصدارات نظام اندرويد بس” – وللأسف اخر تحديث أمنى للنوت 7 كان في شهر سبتمبر 2016! لذلك نصيحة، ابعد خالص عن رومات Note 7 عشام فعلا النهاردة هتلاقي إن مشاكلها اكتر من استقرارها.

خواص روم Possible FS4

روم Possible FS4 بورت من تليفون Galaxy A5 نسخة 2017 بتحديثات أمنية لحد شهر يونيو 2017. الروم مدمج فيها Nougat Ui واللي معموله بورت من Note 8 – بالإضافة لواجهة تاتشويز 8.5 واللي نزل بيها Galaxy S8. طبعا ده بخلاف التطبيقات الرسمية اللي معمولها بورت من النوت 8 زي Music و Gallery و Calendar ومعاهم كيبورد النوت 8 بالإضافة لتحديثات خواص Air Command & Edge & File Manger & Always-On Display & Night Clock.

انا بجرب الروم من ساعة مااتكلم عنها BMG في موقع SamsungVN الفيتنامي “الروم مش موجودة في XDA” وبصراحة مبسوط منها جدا ومستغرب من خفتها واستقرارها اللي مفتقدهم بقالي فترة كبيرة. الروم جابت معايا Screen On اكتر من 4 ساعات وده ممكن بسبب انها جاية مع آخر إصدار لكيرنل فانتوم 1.2u. عموما انا لسة ماجربتش كيرنل DarkLord كالعادة لأن ده كان كافي كآداء واستقرار وبطارية.

من ضمن عيوب الروم ان مفيهاش لغة عربي قوايم “العربي موجود في الكيبورد عادي بس ماتقدرش تخلي التليفون نفسه عربي” هو طبعا مش عيب بالنسبة ليا لأني دايما بستخدم التليفون انجليزي. بس كدة ومالاحظتش فيها اي عيوب تانية من اي نوع. مفيهاش لاج ولا تهنيج حتى ولو بعد فترة من الاستخدام، مستقرة جدا وسريعة، التليفون مابيسخنش، برنامج إختيارات Aroma تقريبا غير باختيارين او 3 وده كويس جدا بالنسبة للمبتدأين. الروم مش هتعوز تفلش معاها اي مودات هي كاملة مكملة لوحدها وناوي استقر عليها الفترة اللي جاية اعتقد غير في حالة لو BMG نزل منها نسخة جديدة. إنما وده “رأي شخصي” دي اقوى وافضل واخف روم جربتها للنوت 3 لحد دلوقتي. طبعا الوضع ممكن يختلف حسب استخدام كل واحد.

وده رابط تاني في حالة لو انت على موبايلك روم مختلفة عن دي وعايز تجرب تطبيقات Samsung Galaxy Note 8 بالإضافة لأصوات وإشعارات النظام.

بالنسبة للكاميرا، هي كاميرا Note 7 بس مستقرة جدا ومفيهاش أخطاء وكل وظايفها شغالة كويس طبعا باستثناء الحاجات اللي بتحتاج الهاردوير بتاع النوت 7.

صور روم Possible FS4

بالنسبة للخلفيات اللي في الصور هي مش موجودة مع نازلة مع الروم بشكل إفتراضي، دي خلفيات iPhone X بدقة QHD. أو تقدر تنزل خلفيات Samsung Galaxy Note 8 أو خلفيات Samsung Galaxy S8 وكلهم بالدقة الكاملة.


خطوات تثبيت روم Possible FS4

بالنسبة لخطوات تفليش الروم المفروض إن مُعظمكوا عارفها بس هنقولها تاني بشكل سريع.

  • الأول يُفضل إنك تراجع الدرس ده كويس في حالة لو أول مرة تفلش روم: كل ما يخص أجهزة سامسونج من روت، رومات، ريكفري، حفظ نسخة إحتياطية من الروم الرسمي | للمبتدأين.
  • راجع الموضوع ده برضه إحتياطي واحفظه عندك: شرح تثبيت الروم الرسمي لهاتف سامسونج باستخدام Odin.
  • خد نسخة إحتياطية من الروم الرسمي زي ماشرحنا في الرابط اللي فوق. هي خطوة مش لازم تعملها بس يُفضل يعني.
  • اول حاجة طبعًا هتحمل الروم من روابطها اخر الموضوع وتحطها على الذاكرة الداخلية أو الميموري في تليفونك.
  • لازم يكون عندك ريكفري TWRP مُعدل بإصدار 2.8.7.0 “ركز في الرقم”. تقدر تنزل النسخة المناسبة لجهازك من هنا: Download شرح إزاي تفلش ريكفري معدل برضه هتلاقي في الموضوع اللي في أول نقطة.
  • من برنامج Odin، فلش أحدث مودم وبوتلودر للنوت 3، نزلهم من هنا: ModemBootloader. طبعاً بيتفلشوا عن طريق برنامج Odin 3.07 في خانات CP للمودم و BL للبوتلودر.
  • من قائمة الريكفري الرئيسية هتروح على Wipe وبعدين تختار الويبات دي: Wipe Cash & Dalvic & System & Data
  • بعدها هترجع للقائمة الرئيسية تاني وهتروح على Install وبعدين تختار ملف الروم وتبتدي تفلشها من زرار Swipe اللي حيظهرلك تحت.
  • أول حاجة هتقابلها هي برنامج إختيارات Aroma – وهتلاقي إن خياراته بسيطة جدا أهمها طبعا اختيار إصدار تليفونك وفي حالتنا هو إصدار N9005 أو إصدارات 4G بأنواعها.
  • هيفضل يثبت في الروم حوالي 5 دقايق، بعدها هتعمل Wipe Cash & Dalvic من الاختيارات اللي حتظهر بعد الروم ماتتفلش.
  • أول بوت ممكن ياخد لحد 25 دقيقة، ماتقلقش ده الطبيعي، بعدها حتظهر خيارات اللغة وإعدادات الروم الجديد، بس في خيار عايزك تاخد بالك منه إسمه Diagnostic Data – إحذف من جنبه علامة الصح.
Diagnostic Data Mohamedovic
خيار Diagnostic Data

بس يا سيدي وكده خلصنا 😀

تحميل روم Possible FS4 لأجهزة Note 3

[better-ads type=’banner’ banner=’20349′ ].

MEGA NZ | AndroidFileHost

مقالات ذات صلة

‫55 تعليقات

  1. السلام عليكم و رحمة الله و بركاته
    اخي الفاضل هل تعمل هده الروم علي جهاز نوت 3 n9002 او هل تنصح بان اجرب هده الروم عليه مع العلم اني الان علي روم MagMa NX ROM و التي يدكر عليها انها متوافقة مع هدا الجهاز الا ان الشفرة الثانية لا تعمل و الي الان لا توجود روم جديده تعمل بشكل جيد … انا استخدمه علي شفره واحده . هل هده الروم تعمل علي جهازي بشفرة واحده

  2. الروم بترستر لوحدها مع انى مفلش البوتلودر و الموديم الى ف الموضوع بتاع حضرتك ارجو الرد

  3. للأسف أخي يوسف لن يوجد أي روم معدلة تستطيع تشغيل الشريحتين معًا لأن معظم تلك الرومات مُخصصة لهواتف Note 3 ذات الشريحة الواحدة. بما أن هاتفك يحتوي على مُعالج كوالكوم ستعمل عليه الروم بلا أدنى مشكلة ولكن بشريحة واحدة فقط.

  4. بارك الله فيك علي الاهتمام و الرد و لك مني جزيل الشكر …سوف اجربها و اتمنا ان يكون هناك تعديل او ابديت للشريحة الثانيه ..وفقكم الله

  5. الكاميرة لا تعمل بشكل جيد و خاصتنا الكميرتان مع لعض ززيقوم بأعادة تشغيل
    هل تنصح بروم للموبايل n9002 note 3 مستقرة و حديثه

    1. العفو يا هارون. انا والله عن نفسي مستقر على الروم اللي انت عامل الكومنت فيها دي 😀 قوية جدا ومستقرة وتكاد تكون بدون اخطاء

      1. معلش يا استاذ محمد شيت على الخطوات وبعد اختيار تثبيت ملف الروم المضغوطة بدء التثبيت وبعد اقل من دقيقة التليفون عمل ريستارت ووقف على شاشة البداية samsung note3 هل ده طبيعي ؟

        1. اول ما يبدا يثبت الروم بعدها ب 20 ثانية يكتب no digest file found والتليفون يعمل ريستارت ويعلق على كلمة سامسونج جربت وثبت روم ريستريكشن ريمكس اللي موجودة هنا اتثبتت عادي والتليفون اشتغل انما دي لا وبرده لما جيت اثبت تطبيقات جوجل خيارات اروما بتحصل نفس المشكلة انما تطبيقات جوجل الميني اتثبتت عادي و دلوقتي انا شغال عليها مع روم ريستركشن ريمكس 7.1.1

  6. حدثت المودم والبوتلودر اللي مضاف مع الموضوع بس اصدار الريكفري مختلف ٣.٢ ممكن يكون ده السبب؟

    1. جالي رسالة عربي والتليفون ما عرضهاش كان فيها مشكلة مش عارف دي مشكلة في الروم ولا عندى انا بس

  7. السلام عليكم ا.محمد
    الروم جميلة وخفيفة لكن يوجد بها معى مشكلتين
    الاولى : لا يحتفظ برقم الدخول لشبكة الوايفى لازم ادخل الرقم كل شوية
    ثانيا : لا يقرا الموبيل على الكمبيوتر كما كان لكى اتعامل مع الملفات بل لا يظهر تمام فى الكمبيوتر
    هل يوجد حل ؟

    1. المشكلتين دول ما ظهروش معايا اولا بيدخل على الواي فاي عادي وبيحفظ الباسوورد وبالنسبة التوصيل بالكومبيوتر هو افتراضي بيكون على وضع الشحن فمش هيظهر على الكومبيوتر انما التليفون هتلاقيه بيشحن فانت اختار وضع نقل البيانات مش الشحن فقط

  8. مبدئيا الروم جميلة جدا وتحس انك اشتريت تليفون جديد فعلا الف شكر ليك يا باشا على الطرح واللي عمل الروم برده
    بس هل مفيش روم تاني مماثل ما فيهوش مشكلة اللغة ؟ وليه معظم الرومات مارشميللو مش نوجا مش فاهم النقطة دي خاصة اني شفت تعليق ليك في صفحة تانية بيقول ان مافيش نوجا خالص على ال touch wiz للتليفون ده ايه السبب ؟ وفي النهاية احب اقولك تسلم

  9. اخى العزيز هارون انا هاجوبك اسمحى يا استانا العزيز ( وليه معظم الرومات مارشميللو مش نوجا مش فاهم النقطة) السبب ان الجهاز اتوقف دعمة اساسا من الشركة المصنعه و اغلب الرومات اللى حضرتك بتشوفها مبنيه على مارشميلوا لان الكور بتاع النوجا مختلف ولسه ما اتعدلش عليه يعنى لسه جديد ز ه هيكون صع جدا انهم يعدلوا عليه لانه لسه جديد
    بالعربى انت اشتريت عربيه 2018 هل هتعل عليها لا هيكون صعب لكن لو عربيه 2010 او 2014 هتعرف تعدل عليها عشان هيكون فى اشكال جديده نزلت ف هتعرف تشكل فيها ف النوجا جديد و ما اعتقدش ان فى حد ممكمن يعدل عليها لكن الماريملوا ثابته و ممكن نعدل عليها ز

  10. سلام عليكم ابومريم يارب تكونوا بخير، للاسف بعد تنزيل الروم وباتباع جميع الارشادات مازالت بتعمل ريستارت مع نفسها تقريبا كل شوية بالرغم من انها جميلة فعلا اى مقتراحات من فضلك شكرا لمجهودك ووقتك

    1. غالبا لأنك نسيت تشيل علامة الصح من خيار Diagnostic Data في اول بوت للروم، ده اللي بيعمل مشكلة الريستارت

      1. لا شيلتها طبعا، هو انا اسف نسيت اقولك على حاجة كمان الروم بتقعد يوم كامل شغالة تمام جدااا تانى يوم علطول الريستارت عامل زى الfast reboot وكتير جدا حتى مش بلحق امسكه

        1. بتشغل الوايفاي مع الموبايل داتا في نفس الوقت يا كيمو؟ بتحصل وانت شابك وايفاي في وقت معين؟

          1. انا شيلتها طبعا لانى مش عارف استخدم التليفون خالص بس على الذاكرة المشكلة كانت بتبتدى وانا فى البيت يعنى التليفون على الواى فاى مش الداتا لكن ممكن يكون الواى فاى بيضعف فيستخدم الداتا مع الواى فاى ساعتها مش اكيد طبعا ردى. اما بالنسبة لوقت معين هى بتفضل شغالة فترة كويس جدااا حوالى 10 ساعات او اقل وبعد كده لا يتوقف عن البووت خالص يفتح ويدخل على التليفون عادى اول ماتحاول تعمل unlock يعمل ريستارت تانى

          2. غالبا المشكلة كانت إنك مشغل الوايفاي والموبايل داتا مع بعض يا كيمو، على كل حال خليك زي منتا وانا يومين كده وهعمل ريفيو عن روم جديدة ان شاء الله

  11. السلام عليكم استاذ محمد
    انا حدثت المودم والبوتلودر وثبت الروم من جديد بس برده لسه ال 4g مش شغالة
    الجديد انى لما بعمل الكود بتاع تشغيل ال 4g الخاص بفودافون بيجيلى رسالة (لتشغيل ال 4g يجب تغيير الموبيل)
    اعمل ايه ارجو الافادة وشكرا.

  12. السلام عليكم
    انا نفسى اغير اسم الجهاز الافتراضى من Galaxy A5 (2017)
    الى Galaxy Note 3 انا دورت كتير و مش لاقى اى حاجة تساعدنى و فكيت ملف SecSettings2.apk ودورت فى xml بس مش عارف اوصل لها لو ممكن اى معلومة او مساعدة اكون شاكر جدا

    1. مش فاهم، يعني انت اسم جهازك A5 وانت عايز تغيره لاسم Galaxy Note 3 ولا العكس؟
      ولا انت بتسأل عموما على طريقة تغيير الإسم؟

  13. انا متشكر على تواصل حضرتك
    روم possible دى لما انزلها بتعمل اسم الجهاز Galaxy A5
    او لما اعمل اعادة ضبط المصنع بيرجع برده الاسم ده لانه افتراضى
    انا عايز اعرف مكانه فين عشان اغيره لما انزل الروم اصلا او اى روم

  14. شكل حضرتك نستنى
    انا مش عايز شرح عرفنى مكان الاسم الافتراضى فين وانا هعيش مع نفسى

    1. أنا فعلاً نسيتك، انا آسف جدًا
      إنت هتدخل الإعدادات عادي جدًا، وبعدين تحت خالص هتروح على خانة About Device
      وبعد كده انزل 3 او 4 خانة هتلاقي Device Name
      زي الصورة دي كده:
      https://i1.wp.com/mohamedovic.com/wp-content/uploads/2017/11/Possible-FS4-BMG-A5-ROM-for-Samsung-Galaxy-Note-3-Mohamedovic-19.jpg
      ومن هنا تقدر تغيره عادي جدًا، أنا آسف جدًا ياابو حميد مرة تانية، أتمنى تسامحني، سهوًا والله.

    2. أما لو عايز تغير رقم الإصدار نفسه اللي هو A520F وعايز تخليه N9005
      فا دي تقدر تغيرها من خلالها ملف Build.Prop وده موجود في مسار /System/ وممكن تعدله ببرنامج Build Prop Editor

  15. حصل خير ولا يهمك ^_^
    عارف انا لما ادخل عند device name من setting
    اعرف اغيرها يدوى لكن الاسم الافتراضى نفسه هو ده الى انا عايز اغيره من البداية يعنى لما اعمل لروم اعادة ضبط المصنع او انزل اى روم جديدة بتنزل باسم البورت او اسم الروم
    انا عايز اعدل على الافتراضى نفسه اخليه نوت ٣
    مش زى مابيظهر مثلا galaxy A5
    ملحوظة
    انا عارف انى بعدل على الاسم ورقم الاصدار و كل حاجة
    من سيستم
    build.prop
    CSCVersion.txt
    SW_Configuration.xml

    لكن مش عارف على اسم الجهاز الافتراضى اتمنى تعرف تساعدنى

  16. طيب أخي … وين رابط الروم …. ؟؟؟؟
    ومشكور على جهودك وأنا إن شاء الله ناوي أبلش بهيك شغلات … بإذن الله تعالى

    1. أهلا بيك يا اسلام
      بس قولي، إنت محتاج روم بنظام اندرويد الخام يعني حاجة شبه إصدارات LineageOS كده
      ولا عايز روم شبه اللي في الموضوع ده؟
      عمومًا، دي أحدث روم تاتشويز لموبايل جالكسي نوت 3 نسخة N900 – وهي قديمة من 2017 للأسف لأن دعم النسخة دي يعتبر معدوم
      بس عموما متوفر ليه رومات Android Pie بس بنظام اندرويد الخام مش معدل زي دي
      ولو محتاجها قولي هوفرهالك

  17. السلام عليكم كيف الحال الروابط الخاصة بتحديث المودم والبوت لودر مش شغاله وانا تلفوني موديله SM-N900P هل بتشتغل الروم عليه

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى