روم بنظام Android 8.1 Oreo بمميزات Pixel 2 لهاتف Galaxy Note 3

ازيكوا يا ولاد 😀 – روم النهاردة بأحدث إصدار من نظام Android 8.1 Oreo وهي روم AOSP بنظام أندرويد الخام لأجهزة Samsung Galaxy Note 3 إصدارات كوالكوم 4G – وهنتكلم تحت عن الشرح التفصيلي الممل لطريقة تفليشها وتجربتها على التليفون عشان ماتقابلش أي مشاكل.

الروم اللي هتكلم عنها النهاردة مطلب جماهيري – الناس ريقها نشف عشان اعمل الريفيو بتاعها 😀
انا عارف اني مقصر والله واتأخرت عليكوا جدا واخر روم اتكلمت عنها كانت من حوالي 5 شهور – بس معلش من غير ضرب – اصلي بيني وبينكوا غيرت موبايلي – بس بصراحة قلبي ماطاوعنيش ابيع النوت ولسة معايا لحد دلوقتي – ولذلك – انا لسة مكمل معاكوا في دعم النوت 3 – لان اكيد معظمكوا عارفين انه مش مجرد تليفون لا انا بعتبره صديق وعلى الأرجح كتير منكوا بيبصله بنفس الطريقة.

روم AOSP بنظام Oreo 8.1 لهاتف Galaxy Note 3

المهم نرجع لموضوعنا – روم النهاردة طبعا بأحدث إصدار نزل من نظام اندرويد وهو اوريو 8.1 – وبيني وبينكوا الروم دي للناس اللي زهقت من رومات تاتشويز اللي كلها بقت شبه بعضها والاختلافات مش بتكون جذرية خالص غير في حاجات بسيطة – روم النهاردة خفيفة بشكل مبهر جدا وسريعة والميزة هنا مش مجرد سرعة ..

ميزة رومات اندرويد الخام بشكل عام مش بتكون في أنها سريعة – لا هو في حاجة أنا متأكد أن كتير منكوا ماجربهاش وهي السلاسة، أيوة السلاسة هنا مش سرعة أو خفة أو الكلام ده كله ولكن معناها أن السوفتوير متوافق مع الهاردوير لأقصى حد ممكن وده اساسا اللي بيميز أجهزة آيفون وماكنتوش بشكل عام وهو أن السوفتوير “اتفصل” على الهاردوير ده – رومات AOSP مش وحشة بالعكس، دي عاملة زي العيل اللي انت بتربيه على اسلوبك انت – كلمة AOSP بالمناسبة اختصار لجملة Android Open Source Project او مشروع اندرويد مفتوح المصدر.

مفتوح المصدر؟ طب ايه الميزة؟! المرونة يا صديقي  – أيوة رومات AOSP عاملة زي الصلصال وتشكيلها سهل جدا ومش معقد وموجهه اصلا لمحبين التعديل واللي بيحبوا يعكوا في أجهزتهم بدون قلق أو طبقات الحماية المبالغ فيها زي اللي في رومات تاتشويز زي خاصية KNOKS وغيرها.

وطبعا نتيجة لكل ده الروم هتديك آداء خرافي غير معتاد خالص مع كل رومات تاتشويز اللي انت جربتها قبل كدة – سلاسة ونعومة وانيميشن رائع وانت بتتعامل مع كل جوانب النظام. وبالٱضافة لكل ده انت لكل الحرية تجرب اي حاجة – حرفيًا انت مفيش عليك اي قيود وتقدر تجيب اي ميزة من أي حتة وتجربها عندك ولو ماعجبتكش ممكن تتشال تاني عادي.

مشكلة واحدة قابلتني ومتهيقلي قابلت ناس كتير جدا ومنعتهم من تجربة رومات اندرويد الخام وهي شكلها، أيوة خلينا متفقين أن الرومات الخام شكلها وحش وده لأنها بتيجي بنظام اندرويد النقي كما يجب أن يكون زي أجهزة Nexus و Pixel وكذلك الأجهزة اللي بتيجي بدعم نظام Android One وبتحديثات مباشرة من جوجل ومش بتيجي بحركات رومات سامسونج لانها بتبقى بواجهة Samsung Experience أو اللي احنا بنسميها تاتشويز المخصصة من سامسونج. بس بيني وبينكوا قولت لنفسي مادام كدة كدة روم خام وكمان نظام Oreo 8.1 – طب لغوصة وعك بقى تعالوا نقلب التليفون كله زي Google Pixel 2 الأخير من جوجل.

طبعًا زي منتوا ملاحظين في الصور أن الاسكرينز كأنها متصورة من تليفون بيكسل 2 وده لأنك مع الرومات الخام تقدر تتشقلب وتجرب وتغير براحتك ده غير أن مفيش حاجة مش مدعمة لأن الروم اصلا يآخر إصدار مستقر من النظام. على كل حال انا اتكلمت قبل كده عن بالموضوع ده بالتفصيل الممل في درس شرح: كيفية تحويل هاتفك الذكي كاملًا إلى هاتف Google Pixel 2! والشرح ده بالمناسبة ينفع حتى للأجهزة اللي بدون روت ولأي تليفون مش سامسونج بس، الميزة هنا بقى إنك بالفعل معاك صلاحيات الروت عشان كده تقدير تخلي كل برامج وحركات جوجل بيكسل الرسمية أساسية برضه على تليفونك مش مجرد برنامج بتثبته والموضوع خلص.

عيوب روم Oreo 8.1 لهاتف Galaxy Note 3

الروم تكاد تكون مستقرة بدون أي عيوب على الإطلاق ولكن قابلني فيها حاجتين. أولهم أن برامج الإرسال والإستقبال بأنواعها فيها مشكلة زي البلوتوث مثلا أو تطبيق Share-It. البلوتوث بيكون شغال عادي وممكن حتى يعمل إقتران كمان مع اي تليفون أو لابتوب، بس تيجي ترسل أو تستقبل هيديك خطأ. حاجة كمان وهي إن التليفون مش متعرف على الكمبيوتر، يعني لو جيت تركبه على الكمبيوتر باستخدام كابل USB الكمبيوتر للأسف مش هيتعرف عليه، فا أما كنت اجي أحط او اخد حاجة من التليفون كنت بضطر افتح الريكفري واستخدام اتصال MTP.

رغينا كتير معلش، تعالوا ندخل بقى في الموضوع ونشرح بالتفصيل إزاي تفلش الروم بتاعت النهاردة على موبايلك عشان مايكونش في أي مجال للخطأ. بس الأول خلينا نتفرج على صور الروم.

صور روم أندرويد 8.1 أوريو لهاتف Galaxy Note 3

تحميل الملفات الضرورية لتثبيت Oreo 8.1 على Galaxy Note 3

[better-ads type=’banner’ banner=’20349′ ].

شرح تثبيت روم Android Oreo على هاتف Galaxy Note 3

  • طبعًا إحنا عارفين إن رومات الأندرويد الخام بأنواعها ماينفعش تتفلش بالريكفري اللي احنا متعودين عليه مع بورتات المارشميلو بتاعت تاتشويز اللي هو TWRP 2.8.7.0 – لا مع الروم دي هنستخدم أحدث إصدار من الريكفري وهو TWRP برقم إصدار 3.2.1.1 وتقدر تنزله من الرابط المرفق في قسم التحميل فوق. هتنزل نسخة الـ IMG وبعدين من الريكفري الحالي على التليفون هتروح لخيار Install في واجهة الريكفري الرئيسية وبعدين تحت من هتلاقي أوبشن إسمه Img أو Image هتضغط عليه وبعدين تروح لملف الريكفري وتفلشه، الريكفري هيسألك الملف ده عبارة عن ايه هتختار إنت إنه ريكفري. وبعد ماتخلص تعمل Reboot Recovery مرة تانية، واما التليفون يفتح تاني هتلاقي بقى عندك الريكفري الجديد.

Install TWRP 3 2 0 0 on Android Devices using TWRP Mohamedovic

  • دلوقتي خلاص إحنا عندنا ريكفري TWRP 3.2xx. دلوقتي هتحتاج قبل أي حاجة تعمل فورمات كامل للسيستم الحالي على التليفون، وماتقلقش الخيار دي بيحذف الروم الحالية بس ومالهوش أي علاقة بملفات الذاكرة الداخلية زي الصور أو الفيديو اللي عندك. من واجهة الريكفري الرئيسية هتروح لخيار Wipe وبعدين Advanced Wipe وهتختار Dalvic – System – Cash – Data وبعدين هتسحب على زرار Swipe اللي تحت عشان تبتدي عملية الفورمات زي الصورة اللي جاية.

Wipe System using TWRP Mohamedovic

  • هتروح تاني على خيار Install في واجهة الريكفري الرئيسية وبعدين هتروح لملف الروم اللي انت نزلته من فوق وتختاره، بس استنى بلاش تفلشه دلوقتي. هتلاقي خيار Add more Zips بعد ماتختار ملف الروم، هتضغط عليه وبعدين هتختار حزمة خدمات جوجل GApps وبعد كده تبتدي التفليش زي الصورة اللي جاية.

Flash Oreo ROM via TWRP Mohamedovic

وكده خلصنا! بعد ماتخلص تفليش من تحت هتختار Reboot System – بس استنى! الريكفري هيقولك إن جهازك مش عليه روت وإنه عايز يفلشلك فيرموير SuperSU – انت ماتوافقش وقوله Do not install وبعدها التليفون هيعمل ريستارت وهياخد تقريبا 10 دقايق مع أول بوت، ماتقلقش ده الطبيعي. الروم هيفتح على الروم الجديدة، ابتدي ظبط إعداداتك وسجل دخول في أكونت Google.


لانشر Google Pixel 2 لجميع هواتف أندرويد | بدون روت

طبعًا دلوقتي هتلاقي أن الروم بشكل أندرويد الرخم الخام وهنا جه وقت شوية التعديلات البسيطة جدًا اللي هنعملها عشان نخلي التليفون نسخة طبق الأصل من تليفون Google Pixel 2. أولًا عندك خيارين، أولهم أنك تنزل لانشر بيكسل 2 من نظام Android 9.0 P نسخة المطورين اللي نزلت من حوالي شهر تقريبًا، أو تستخدم لانشر Pixel 2 من نظام Android Oreo واللي انا استخدمته وباين في صور الروم. اللانشر ده بالمناسبة مش متاح بشكل رسمي لأنه حصري لأجهزة جوجل بس، بس طبعًا مطورين XDA عمل نسخة مُخصصة/ مُعدلة من اللانشر عشان تشتغل على أي جهاز أندرويد بدون حتى ماتحتاج للروت، بس طبعًا من غير الروت للانشر مش هيبقى بكل مميزاته ولكن برضه هيفضل اختيار مميز وقوي جدًا.

تحميل Rootless Google Pixel 2 Port

[better-ads type=’banner’ banner=’20349′ ].

Download From GitHub

وطبعًا عشان الحلو يكمل، هنحتاج كمان خلفيات Google Pixel 2 الرسمية بدقة QHD وكمان مجموعة الخلفيات المتحركة اللي كانت جاية بشكل حصري مع أجهزة بيكسل الأخيرة من جوجل وبرضه مش متاحة بشكل رسمي، بس في النهاية ده نظام أندرويد، مفيش حاجة اسمها حصري 😀

خلفيات هاتف Google Pixel 2 بدقة QHD | الخلفيات المتحركة Live Wallpapers من Pixel 2

أما بالنسبة للأيقونات، إنت ليك حرية الإختيار في الموضوع ده لأن الخيارات كتير جدًا، بس انا عن نفسي استخدمت حزمة أيقونات Google Pixel 2 والمتاحة بشكل مجاني في متجر Play Store. والباقي طبعًا زي البرامج والأسماء والرسايل تقدر تعرفها وتشغلها بالتفصيل من موضوع تحويل هاتفك الذكي كاملًا إلى هاتف Google Pixel 2.


إنتهي. يُمنع النقل بدون ذكر المصدر

مقالات ذات صلة

‫35 تعليقات

  1. سلام صديقنا العزيز شكرا على الروم هى جميلة فعلا بس خسارة ان القلم مش شغال بقوته بخصوص التوصيل على الكومبيوتر ادخل الdev options وغير من charging to mtp وفى بردو اختيارات للbt بس لسه ملحقتش اجربها هكتب رسالة تانية عنها لو لقيت حاجة

    1. لأن جميع وظائف القلم تعمل فقط مع رومات سامسونج بواجهة تاتشويز ولا تعمل برومات نظام أندرويد مفتوحة المصدر أخي كريم.
      أما بالنسبة للكاميرا لم أواجه هذه المشكلة!

  2. السلام عليكم
    مشكور على الروم
    بس هو مفيش تعديل قريب للىوم دى علشان المشاكل اللى فيها

  3. السلام عليكم
    مشكورين على المجهود المبذول فى المدونة
    كان عندى سؤال؟
    مفيش روم جديدة للنوت 3 4g قريب

    1. والله ياابو حميد انا متابع كل جديد، ومجرد مابيكون في حاجة جديدة انا بتكلم عنها علطول
      ولكن للأسف احنا هنا بنتكلم عن جهاز من 2013 والمطورين دعموه فعلا لحد ماوصل لنظام Oreo 8.1
      لذلك وجود رومات جديدة ليه خصوصا تاتشويز أعتقد صعب جدًا للأسف.

      1. مشكور على الرد

        بس عندى سؤال؟

        هل فى رأيك ممكن ينزل تعديل لروم Android 8.1 Oreo الموجودة حاليا

        1. الموجودة حاليا في تحديث ليها بالفعل وهو RR 6.1 بنظام Oreo 8.1
          انا اسف جدا لاني في الشغل دلوقتي بس اول ما اروح هديك لينك التحميل بجانب ملف GApps

          1. شكرا على الإهتمام

            هو التحديث ده عالج المشاكل اللى كانت فى الروم القدية زى برامج الارسال والاستقبال و التوصيل على الكمبيوتر؟

  4. شكرا على الإهتمام

    هو التحديث ده عالج المشاكل اللى كانت فى الروم القدية زى برامج الارسال والاستقبال و التوصيل على الكمبيوتر؟

  5. عندي مشكله بعد ما نزلت الروم ان الشبكه مش ظاهره عندي والجهاز مش شايف الشريحه خالص ورجعت عملت ريستور تاني للنظام القديم لقيت الشبكه شغاله وتمام ورجعت حملت الروم دا تاني مره وبرده نفس المشكله , يا ترى ايه الحل

  6. الصراحه بعد ما نزلت الروم دا عجبني جدا جدا جدا فعلا في سلاسه غريبه والجهاز مرتاح الى اقصى درجه لكن للاسف يا فرحه ما تمت مشكله الشبكه دي واجهتني ومش عارف اعمل ايه ممكن في مود معين لتصليحها الله اعلم يارب يكون فيه لانه بجد انا نويت استقر على الروم دي لو مشكله الشبكه دي اتحلت باذن الله , وشكرا

    1. منور البلوج المتواضعة يا عبدالرحمن ومبسوط جدًا إن الروم عجبتك.
      بس للأسف إنت الوحيد اللي اشتكيت من موضوع الشبكة ده!
      طيب إنت نفذت تعليمات التثبيت كويس؟ افتكرت تعمل Wipe Cash & Dalvic بعد مافلشت الروم؟
      اتأكد كده تاني من الخطوات ولو لسة المشكلة موجودة ياريت تكتب كومنت تاني.
      وكل سنة وانت طيب يا صديقي

  7. السلام عليكم يابو مُعز
    جميل اوي شرحك بس للاسف انا عندي مشكلة و مش عارف حلها
    تليفوني note 3 SM-N9005
    و الريكفري اللي علية هو TWRP 2.8.7.0 و جيت اعمل الطريقة اللي حضرتك قولت عليها علشان اخلي الريكفري عندي إصدار 3.2.1.1 بيعمل اريستارت مرتين و برضة مفيش اي ريكفري بتركيب علية…. و دي في تركيب اي ريكفري تاني
    بمعني ان الريكفري اللي ماشي علي تليفوني TWRP 2.8.7.0 و مفيش اي ريكفري تاني ماشي علية باي طريقة و حولت كتير احل المشكلة دي و مش عارف اعمل و ياريت لو عندك حل تقولي في اقرب وقت

  8. اولا الف شكر علي ردك
    و عملت كل الخطوات اللي موجودة في شرحك
    بس للاسف انا لسة في نفس المشكلة … و لسة بيعمل اريستارت مرتين و مفيش اي تحديث للريكفري

    1. عليكم السلام ورحمة الله وبركاته
      في 3 رومات بنظام Android Pie للنوت 3 بالفعل.
      واحدة AOSP خام – وواحدة اسمها Potato Project – أما الأخيرة فهي LineageOS 16.0
      بس لسة ولا واحدة فيهم فيها شبكة، يعني كل حاجة فيهم شغالة إلا المكالمات، عشان كده لسة ماعملتش ريفيو لولا واحدة منهم.
      بس مجرد المشاكل ماتتحل ماتقلقش هتلاقيني كاتب عنها علطول.

    1. حلوة وتعتبر مفيهاش مشاكل، بس لسة مش مستقرة أوي وبتستنزف البطارية بشكل مبالغ فيه
      تقدر تجربها وتفليشها بنفس الطريقة في الروم دي

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى