جهاز Samsung Galaxy Note 8 بشاشة 4K | رام 6 جيجا | 3 مكبرات للصوت !

طبعا بما ان خلاص سامسونج هتعلن عن جهازها الجديد Galaxy S8 & S8 Plus يوم 29 مارس اللي جي كمان كام يوم واللي عرفنا معظم تفاصيله بما ان كلها اتسربت حتى ال UI وكمان البرامج بتاعته ، دلوقتي بقى ميعادنا مع النجم الجديد Samsung Galaxy Note 8  ..

دلوقتي بقى بدأ للاهتمام بالنجم الأقوى في اجهزة سامسونج وهو Galaxy Note 8 - وبدأت تظهر تسريبات عنه فعلا من امبارح ، سيبكوا بقى خالص من Galaxy S8 هو كدة كدة ليه ناسه وجمهوره اللي حتى لو سامسونج نزلته جهاز فاشل بدون مواصفات منافسه برضه هينجح "طبعا انا مش بقول انه جهاز فاشل و S7 Edge اكبر اثبات على كدة" - الفكرة فعلا في سلسلة Note دي اللي عايزالها واقفة خصوصا بعد أزمة Galaxy Note 7 الاخيرة وانه كان للأسف بينفجر !

سامسونج مجبرة "حرفيا" انها تخرج جهاز نوت "خارق" للعادة - مش مجرد منافس عشان تقدر ترجع ثقة جمهور النوت تاني (اللي انا منهم بالمناسبة) وناس كتير جدا زيي خصوصا ان Galaxy Note 7 كان فعلا اختراع ولو كان استمر كان هيقعد شركات كتير في البيت - طبعا ده مش تحيز ولا حاجة بس ده فعليا كان واقع بعد الإبداع اللي كان في جهاز Note 7 من سامسونج ..

Galaxy Note 8 4K Display

التقارير والأخبار عن Galaxy Note 8 الجديد من سامسونج بتقول انه جي بشاشة مقاسها 6.4 إنش بدقة 4K - طبعا حجم الشاشة مش غريب ولا حاجة بما ان Galaxy S8 Plus جي بنفس المقاس مع تقليل الحواف لأقصى درجة عشان الاستفادة القصوى للمقاس الكبير ده ده غير ان الشاشة هتكون منحنية من الطرفين  ..
طبعا هو مش اول جهاز يعمل الحركة دي بشكل فعلي لان سوني سبقت سامسونج في الموضوع ده في جهازها الاخير Sony Xperia XZ Premium ..

Samsung Exynos 9 Series

اما بالنسبة للبروسيسور بالمنطق هيكون اخر حاجة من كوالكوم وهو Snapdragon 835 الجديد كليا واتكلمنا عنه بالتفصيل قبل كدة خصوصا في استهلاكه الرائع والبسيط للطاقة ..

وده هيبرر موضوع الشاشة ال 4K و استهلاكها للبطارية - طبعا في المقابل هتكون النسخة التانية بالبروسيسور بتاع سامسونج اللي هو Exynos 9810 مع اخبار مؤكدة بتقول ان سعة الرام هتكون 6 جيجا .. ده أمر مش مستبعد على فكرة بما ان السنة اللي فاتت كان فعلا في نسخة من Galaxy Note 7 سعة الرام فيها 6 جيجا بس كانت موجهة للصين بس عشان وقتها تنافس One Plus 3 اللي كان برضه برام 6 جيجا واعتقد برضه ان Galaxy S8 ماجاش بذاكرة عشوائية 6 جيجا عشان السبب ده والا كان هيبقى Galaxy Note 8 مفيهوش اي اختلاف عن Galaxy S8 غير القلم بس بما انهم في الغالب هيكون نفس باقي مواصفات الهاردوير من كاميرا أمامية وخلفية وبروسيسور سواء رباعي النواه من كوالكوم او ثماني النواه من سامسونج ..

اما بالنسبة للكاميرا في تقارير من كوريا بتقول ان سامسونج ناوية تستخدم كاميرا مزدوجة Dual Camera في نسخة واحدة من نسخ Galaxy Note 8 يعني زي ما Apple عملت كدة في iPhone 7 & iPhone 7 Plus ، بالإضافة لإنها هتستخدم 3 مكبرات للصوت  - ايوة انت قريت الرقم صح لان سامسونج عايزة تستغل استحواذها الأخير على شركة Harman المتخصصة في الصوتيات عشان تخلي Galaxy Note 8 بتجربة صوتية متميزة ..

اما باقي المواصفات فهي المتعارف عليها في سلسلة Galaxy Note زي ميزة القلم S Pen بس طبعا هتكون بشكل مطور وبأفكار جديدة زي محنا متعودين من سامسونج بالإضافة طبعا لخاصية Iris او قارئ قزحية العين ..

اخيرا : كل اللي انا قولته فوق قد يكون صح او غلط بما إنها مجرد تسريبات بس طبعا مجرد مايكون فيه تقارير لازم بنكتب عنها خصوصا لو عن جهاز مهم زي Galaxy Note 8 ..

المصدر : Alleged Note 8 specs 

 

رُبما تُحِب أيضًا

أترك رد

بريدك الإلكتروني أو أي معلومات سرية أخرى لن يتم نشرها.